WEB ta propone aumento entre 10% pa 20% riba awa y coriente

Den un carta oficial cu WEB Aruba NV a manda pa Gobierno, siendo doño di e compania, ta pidi permiso pa adapta tarifanan. E peticion a bay algun dia caba y ta purba pa haci’e posibel desde luna di juli, cu ya a transcuri caba. E aumento ta debi primordialmente na e cambionan den e tarifanan internacional, mara na un aumento adicional cu Gobierno di Aruba a pidi pa mehora e calidad di Heavy Fuel Oil, pa alivia e problema di huma cu ta bay riba waf na Barcadera. E dos componentenan aki hunto ta alcansa mas o menos 15.6% di aumento di e tarifa regular.

Ningun decision ainda

Aunke cu WEB Aruba NV a bati alarma na Gobierno cu nan ta den necesidad pa un aumento, toch ainda no a tuma ningun decision. Prome cu yega na Gobierno, Utilities Aruba N.V. mester reuni riba e peticion di WEB y manda un conseho pa Gobierno di Aruba. Hecho ta cu no tin mucho espacio pa “vrijwiel” pasobra mas tarda, mas e ta afecta e caha di WEB, te na un margen cu banconan lo tuma medida si no por garantisa entrada fiho y cu ta cubri e gastonan di e compania. Entre e gastonan ta figura tambe pago di debe di fiansanan haci pa e proyectonan di renobacion y modernisacion di e planta. Na momento cu banconan sinti cu tin un risico cu WEB no lo por cumpli cu e pago di fiansanan, ta tuma medida inmediatamente.

Hedging lo por tabata e salbacion

Gobierno di Aruba, encabesa pa Prome Minister mr. Evelyn Wever-Croes a tuma un decision specifico pa NO hedge e prijs di combustibel cu WEB ta cumpra den exterior pa por produci awa y coriente. Den pasado Gobiernonan, di MEP y AVP, semper a hedge. E ta un tipo di seguro pa garantisa un solo tarifa ora cumpra combustibel. Claro, algun aña el a sali beneficioso pa Aruba y berdad tambe ta, cu algun aña e no tabata na nos bentaha. Pero, esey ta seguro y si e no tin riesgo, lo no tabata necesario pa hedge tampoco. Pero, Gobierno tabata bou presion enorme den dianan di Pasco aña pasa pa tuma un decision. Na e momento ey a dicidi pa hedge solamente tres luna, pues Januari, Februari y Maart. Ora WEB a pidi Gobierno pa hedge e resto di aña, a contesta negativo. Consecuentemente, desde dia 1 di april 2018, WEB ta paga e prijs internacional manera cu e ta, pues halto of abou. Lamentablemente desde april e prijsnan ta subiendo y aunke WEB a logra absorba e prijsnan pa algun luna, awor e no por mas y ta pidiendo pa aumento.

Priminti ta debe

Pa e coalicion MEP-POR-RED, esaki ta un otro reto pa por cumpli cu locual a priminti den campaña. A bisa e tempo ey cu lo baha e tarifanan y lo elimina hedging. Aunke expertonan a taha nan di e promesa aki pasobra realisticamente e ta imposibel, toch a sigui e caminda ey. Awe, ta duro pa e mesun Gobierno bay bek na pueblo y splica cu ta aumenta e tarifanan. Es mas, te cu algun siman pasa ainda Prome Minister Evelyn Wever-Croes a priminti cu na luna di juli ultimo prijs di awa y coriente mester baha! Despues a bini e scenario di ASTEC, den cual el a bisa cu pa rasonnan di salud di hende, lo mester cambia e crudo y cu e partnernan lo mester yuda paga si e prijs subi. Ken ta e partnernan no ta conoci, pero na mesa tabata t’ey APA, ASTEC y ATIA. Cualkier un di nan, sigur ASTEC, si aumenta nan impuestonan, mesora lo por traduci esaki den un aumento den prijs pa maneha containernan riba waf.