WEB tin ekiponan cu por wordo modifica pa traha espacio pa gas. Segun director y CEO di WEB Aruba NV, Luis Oduber. E ta sigui splica cu na momento cu logra un contract, por dura un aña prome cu e gas yega Aruba y durante e aña ey tin algun ekipo cu por converti.
Ta papiando di rond di un tiki mas di 40 of 45 Megawatt, di produccion cu lo por tin dentro di un aña cu por cuminsa bay riba gas. E sobra lo bay evalua con lo bay bin cun’e. Tin diferente indicativonan di prijs pa ekiponan nobo y una bes cu e ta mas concreto lo por bay fiha prijsnan mas concreto pa cuminsa riba e proyecto eynan.
Utilities ta keda doño di WEB, cu na final Gobierno di Aruba ta doño. Na momento cu decisionnan grandi bin, e proyecto riba su mes ta rekeri inversionnan grandisimo. Naturalmente tin cu haya aprobacion di nan raad, den e caso aki di Utilities y Gobierno mester sa ki direccion ta tumando y kico ta bay ta e consecuencianan. Sea e ta un aumento, reduccion, stabilidad. Tin hopi factor cu no por cuantifica ainda na e momentonan aki. Por ehempel por menciona riba e gastonan di mantencion mester reduci substancialmente, pero no tin e diferencia ainda. Na momento cu bay over riba gas, lo bay cuantifik’e. Tur indicacion ta, papiando cu otro companianan cu a haci e cambio eynan caba, e gastonan di mantencion ta reduci drasticamente y sin menciona medio ambiente tambe cu ta bay ta un alivio grandi, segun Oduber.
