Despues di e anuncio cu ta blokia trafico aereo y maritimo pa e islanan Aruba, Boneiro y Corsou den fin di siman, a causa masha reaccion di banda di e paisnan den Caribe Hulandes. Esey a haci cu diabierna awor ta tuma luga un reunion di nivel halto riba nos isla, cu bishita na nivel di Ministernan y Embahadonan di Venezuela, Corsou, Aruba y di Hulanda.
E impacto di e medida impone dor di Venezuela ta grandi, tanto den cantidad di turista bishitando e islanan pero specialmente pa e liña di carga cu ta sali di Venezuela pa e islanan, specialmente fruta y berdura. Tanto na Aruba, Corsou y na Boneiro, e trafico di hende den forma di turismo ta grandi. Na Aruba por ehempel Venezuela ta e di dos mercado mas grandi despues di Merca, pues 6 dia sin ningun vuelo sin duda ta afecta nos cifranan di turismo e luna aki, pero tambe fruterianan a mira e efecto mesora.
Hulanda tambe a tuma nota di e decision, specialmente pasobra Boneiro ta resorta desde 10-10-10 direct bou Hulanda. Den Parlamento na Den Haag tambe a bin critica riba e forma cu Gobierno Hulandes ta atendiendo e asunto, pasobra ta sugeri pa laga Union Europeo cay aden y aplica e mesun blokeo bek, sosteniendo e islanan Hulandes cu de facto indirectamente tambe ta forma parti di Union Europeo. Para tur transporte y carga di Venezuela pa tur pais Europeo kisas lo laga Gobierno Venezolano sinti e mesun efecto cu e ta eherciendo contra tres isla indefenso.
Hecho ta cu e mensahe di Hulanda a yega Venezuela y hunto a acorda cu lo sinta diabierna awor na Aruba, den un reunion na nivel di Minister y diplomaticonan halto pa por sali for di e impasse. Ministerio di Relacionnan Exterior di Hulanda ta organisa e reunion na Aruba, hunto cu VNO y Departamento di Relacionnan Exterior di Aruba. E Embahador di Reino Hulandes na Caracas lo biaha pa Aruba, lo tin representacion halto di e Departamento di Relacionnan Exterior di Hulanda biniendo Aruba pa e reunion. No ta mucho bon conoci si Secretario di Estado Knops lo keda Aruba pa atende e reunion aki. Di parti Corsou lo tin un Minister presente, mescos cu ta Ministernan di Aruba cu lo sinta den dicho reunion. For di Venezuela ta sperando un delegacion pisa na nivel di Minister cu lo trece e mensahe di Venezuela pa Reino Hulandes.
Gobierno di Venezuela ta sperando cu Aruba, Corsou y Boneiro (Hulanda) ta tuma medidanan necesario pa evita contrabando di productonan Venezolano pa Aruba. Den pasado, mescos ta sosode cu contrabando di gasolin, cu Aruba ta bisa cu aunke nos sa cu e combustibel ta sali di contrabando di e pais bisiña, cu esey no ta nos problema, pero contal cu e ta drenta legal Aruba, pagando e impuestonan necesario. Den tipo di casonan asina Venezuela ta spera mas y miho colaboracion di e islanan den Caribe Hulandes pa hunto combati contrabando.
Mientras cu tur atencion aki na Aruba ta riba e mercado di gasolin, e problema mas grandi mes ta e importacion di koper y hero bieu cu ta bin Aruba di transito y sali pa otro paisnan. Tin companianan cu ta atende cu “scrap material” cu a crece bira gigante basa riba importacion di material bieu di Venezuela. No ta interesanan cu e heronan ta horta di un refineria na estado Falcon y ta sali di contrabanda, basta nan tume na Aruba na un prijs hopi abou y di aki manda pa otro paisnan den Latino America y Merca cu ta paga bon placa pa e material.
Gobierno di Aruba ta cla pa anuncia medidanan estricto di importacion for di Venezuela, den cual lo traha di cerca cu autoridadnan Venezolano den kico “si” y kico “no” lo importa mas na Aruba. Di e forma ey Cuerpo di Aduana di Aruba, Corsou y Boneiro lo obliga e importadonan di carga, pa mustra cu nan a tramita tur documento na Venezuela prome cu a sali cu e materialnan y/of productonan.
Di otro banda, pa Gobierno di Reino Hulandes, e forma con Gobierno Venezolano a bira tuma medida pa den cierto forma “castiga” e islanan aki no ta aceptabel. Claro cu den casonan asina tin dos mercado, esun cu ta bende y esun cu ta cumpra. Venezuela no por culpa e islanan aki pasobra si fronteranan no ta cera y cu su mecanismonan di control ta fayando. Lo por a logra e mesun efecto si a bin cu un delegacion na e islanan y na mesa atende e retonan y logra e mesun resultado na final, sin mester pone nos bou presion y menasa.
E reunion diabierna awor lo ta na nivel halto, cu Ministernan, Embahadornan y Consulnan di Venezuela y di Reino Hulandes hunto cu Ministernan pa na nivel politico y diplomatico, yega na acuerdonan nobo.
Despues lo sigui reunionnan na nivel tecnico y di ehecucion den cual departamentonan manera Cuerpo di Aduana, Departamento di Impuesto (SIAD), Departamento di Asuntonan Economico (DEZHI), Polis, Inmigracion (IASA) y DIMAS lo mester ehecuta e acuerdo politico cu e paisnan yega na dje. Ta spera cu pa diabierna atardi mes lo yega na acuerdo y cu lo reanuda vuelonan atrobe tanto via avion como barco entre Venezuela y e tres islanan den Caribe Hulandes.