18 di Augustus 2017: E klas di 2016 di Cuerpo Policial di Academia Policial Watty Vos a huramenta dilanti di Minister di Husticia, mr. drs. Arthur Dowers, pero tambe tin cu a ricibi
diploma.
Tanto Minister Dowers como Cuero Policial tabata orguyoso di por a entrega un cantidad di diploma na Polisnan. Varios Polis a ricibi nan diploma MBO-4, tambe a completa e “middenkader opleiding”. For di momento cu Minister Dowers a bira Minister di Husticia 8 aña pasa, el a confronta cu hopi reto pa loke ta e organisacion Policial, e opleiding di Polis, etc.. Pero awo a completa un ciclo hopi importante, pasobra a termina hente e reorganisacion. A yega asina leu di a completa e opleidingnan cu tabata falta y awo tur ta na nan luga. E Polisnan a ricibi oportunidad di sigui crece den nan carera y esaki ta hopi importante pa nan pero tambe pe comunidad. Esaki ta bin pa motibo cu polisnan ta miho prepara compara cu antes.
Un total di 23 polis a huramenta dilanti Minister Dowers y Altocomisario mr. Adolfo “Dolfi” Richardson. E graduadonan aki pronto lo keda agrega den Cuerpo Policial y asina nan por bay cuminsa core stage y despues bira Polis. Tambe tin casi 40 persona pa cuminsa cu e opleiding. “Nos sistema a funciona y ta funcionando na e momento aki”, e mandatario a expresa. Tur hende mester ta orguyoso y como un pais chikito, den circunstancianan hopi dificil a logra di mantene e nivel di integridad di e servicio di Cuerpo Policial halto. Esey ta pone cu hendenan kier forma parti di dje y ta forma parti di Cuerpo Policial, ta tene nan na linea halto cu a pone pa cu e parti di integridad. Tambe nan mester sa cu mester cumpli cu ley y normanan cu Cuerpo Policial a pone.
