Diadomingo 15 di april a tuma luga pa di 38 aña e popular Fiesta Rotaria organisa pa Rotary Club of Aruba. For di oranan trempan den mainta tabata tin un publico grandi cu tabata presente na e parking lot di Compleho Deportivo Guillermo Trinidad na Dakota.
E aña aki un biaha mas tabata tin hopi producto, manera muebels, verf, comestibel, mata, paña, joyas y articulonan electronico, boeki y hopi mas, na benta na prijsnan hopi atractivo! Ademas di esaki tabata tin hopi stand di bebida y cuminda, por a cumpra BBQ y tambe differente snacks. Henter famia por a pasa full un dia na Fiesta Rotaria ja cu pa cada gusto tabata tin algo. A dedica un huki special pa nos muchanan cu differente wega nan popular, den e famoso “kids corner”. Cual e aña aki tambe tabata tin na benta bruki den tur size pa mucha y hende grandi.
E publico presente por a disfruta di diferente show di baile di Club di Movimiento y Pierewietje. Tambe di Club Kibrahacha 60+ tabata presente cu diferente obra di man di nan miembronan. Despues di merdia ‘NFuzion a deleita e publico te banda di 6’or di atardi.
Na final di e Fiesta Rotaria a saca e numbernan ganador pa e rifa den presencia di notario. E aña aki pa solamente Afl. 25,- bo por gana un di e 12 tremendo premio nan. E numbernan ganador ta lo siguiente:
1st Suzuki Vitara GLX / Ultimate Automobiles: ticket 14094
2nd All-in cruise for 2 from Miami / Maduro Travel: ticket 1700
3rd 2Tickets Aruba-Amsterdam-Aruba / KLM: ticket 7799
4th 55”TLC TV / AMC UNICON: ticket 1437
5th iPhone8 64GB factory unlocked / Boolchand’s: ticket 11232
6th Afl. 1500 gift certificate / Kooyman: ticket 3560
7th Afl. 1500 Kompa Leon money card / CMB: ticket 3440
8th Afl. 1500 gift certificate / Boolchand’s: ticket 4390
9th Alf. 1000 gift certificate / Ling & Sons: ticket 4123
10th 2Day Weekend stay for 2 / Divi Resorts: ticket 4424
11th La-Z-Boy Recliner / Hagemeyer: ticket 10566
12th Afl. 750 gift certificate / Pearl Gems: ticket 3353
Masha pabien na tur ganador cu den e siguiente dianan lo wordo aserca pa por entrega e premionan. Y hopi danki na tur esnan cu a aporta na Fiesta Rotaria sea cu a bin bishita nos of cumpra rifa. Nos ta conta cu bo(so) contribucion atrobe otro aña, asina President Gerardo Oduber a comenta.
Rotary Club of Aruba kier a gradici tur su miembronan, Rotaractors, Interactors, boluntarionan y sponsors cu a contribui na un tremendo y exitoso Fiesta Rotaria y tambe e rifa posibel un biaha mas. E aña aki Rotary Club of Aruba a logra recauda Afl. 375.000 net, masha danki pa boso contribucion, cu esaki Rotary Club of Aruba por sigi yuda nos comunidad.
