Tur minister lo mester cana loke ta e alma y curason di partido MEP

No tin cartera defini. Loke si Glenbert Croes di MEP a menciona ta kico ta e causanan cu e tin na curason. Unda cu nan pon’e, si e logra pasa e screening y cu e bira minister, unda cu nan pon’e, lo e traha riba a areanan di responsabilidad cu tin. Pero e causanan cu e tin na curason, como politico, luchado pa e pueblo aki, e no ta bay sacrifica nan. Si tin un tema unda cu tin cu bati na porta di un otro minister, pone pa sigura cu e minister ey tambe ta cana riba e mesun rumbo cu loke ta e alma y curason di loke ta e lucha di partido MEP, cu nan a bay cun’e den campaña, lo e bati porta di tur minister pa sigura. E kier ta un colaborador cu lider di partido, awor aki formador y proximo minister presidente, pa sigura cu e gobierno den su totalidad, no obstante den coalicion, ta cumpli cu pueblo.

Nos pueblo no kier ricibi mal noticia mas. Nos pueblo a wordo mata, castiga, gedal den e ultimo ocho añanan aki cu sla. Debe pueblo alivio cu e trabao, accion di gobierno. Esey mester ta motibo pa lanta tur dia for di soño pa loke ta trata e cuater añanan aki pa e Gobierno cu lo wordo forma.

 

Screening

Tin hende ta comenta cu Croes no lo bira minister pasobra e no por pasa screening. Glembert Croes a splica cu realidad ta cu proceso di screening ta un proceso cu ta uno riguroso. Ta bo shirishiri nan ta saca ora di screening. E no ta nada facil. Si e pasa screening of no, lo haya sa den e proximo dianan. E ora lo sa si el a logra si of no. Un paar di ora mas di pasenshi no ta mata. Pueblo conoce Croes miho cu ningun hende. Hues di ken Glembert ta, no tin miho hues cu nos digno pueblo, kende a lucha pe, awo cu el a bin bek den politica, despues di 2013. Pueblo ta su hues. No tin ningun hende pa huzg’e, huzga su alma, huzga su conducta, huzga su postura, huzga su intensionnan, huzga su proposito, huzga su rectitud cu nos propio pueblo. Pueblo ta huez di su destino politico y den nan man e destino politico di Croes lo keda, pase loke pase.