Tube a dal den boto ancra den lama heridando dos turista

Disfrutando di nan vakantie na Aruba, dos turista a dicidi riba tube, pa asina pasa un rato contento. Dado momento durante maniobra, e boto cu tabata lastrando e tube, a calcula e biradanan cu e tabata tuma malo, cu e consecuencia cu e tube a bay dal den un boto ancra, heridando e dos turistanan aki.

Algun hende cu a mira esaki, a bay di biaha na rescate di e turistanan. E pareha a wordo yuda pa personal di ambulance manera cu a trece nan canto, prome e cabayero, kende tabata mas grave y despues e dama. E incidente a sosode un tiki panort di Riu Hotel. Unidadnan di strand, Noord y Maritiem tabata tey presente pa duna un man den e accidente aki.

Tambe personal di hotel a bin yuda. Dos ambulance tabata na e sitio pa asina transporta e turistanan pa hospital pa ricibi tratamento medico. E turistanan a dal nan curpa hopi duro den e boto cu tabata ancra.