Presidente Donald Trump a anuncia riba diabierna, 13 di April, a ordo atake riba e regimen Sirio como respuesta na un atake di armanan kimico cu a tuma luga fin di siman pasa.
“Mi a ordo e forsanan arma di Merca pa lansa atakenan preciso riba obhetivonan relaciona cu e capacidad di armanan kimico di e dictador Sirio Bashar al-Assad,” Trump a bisa for di e Sala Diplomatico di Cas blanco.
Trump a bisa cu e atakenan ta den coordinacion cu Francia y Inglatera, agregando cu e obhetivo di e campaña ta pa “establece un fuerte elemento di disuasion contra e produccion, propagacion y uzo di armanan kimico.”
“E respons combina di Merca, Inglatera y Francia, na e atrocidadnan aki lo integra tur instrumento di nos poder nacional: militar, economico y diplomatico,” Trump a bisa.
Trump a indica cu e atakenan lo continua te ora cu e uzo di armanan kimico pa e regimen Sirio stop.
“Nos ta prepara pa mantene e respons aki te ora cu e regimen Sirio stop di uza e agentenan kimico prohibi aki,” Trump a bisa.
