Diabierna mainta 7:40am a sosode un incidente na altura di Rudsen Bar na Santa Cruz, ora un dumptruck color berde a laga piedra y santo cay riba caminda. Consecuentemente e barancanan grandi a dal y a haci daño na por lo menos dos auto coriendo tras di e truck. Parce cu chaffeur di e truck no a ni ripara y a sigui core bay.
E auto marca Chevrolet modelo Spark color geel-creme cu number A-30715 a ricibi daño, mescos e otro auto marca Hyundai modelo Elantra color blanco cu number A-1434 tambe a keda atras cu daño material.
Polis a cera e caminda pasobra dificilmente auto por a sigui pasa eyriba y pa evita cu ta comete mas daño. A keda warda riba DOW cu no a yega nunca mas pa kita e piedra y santo for di riba caminda.
Polis di Trafico tin e tarea awor pa bay busca e dumptruck color berde envolvi den e incidente aki. Obviamente e tin cu paga e daño cometi na e dos autonan cu inocentemente a haya daño cometi dor di barancanan grandi cu a sali cay riba nan.
