Tri-atletanan Renze Postma y Linda Smit ta triunfa den e Sprint Triathlon Nacional

Diadomingo ultimo, Aruba Triathlon Association a tene nan campeonato nacional di Sprint Triathlon unda un cantidad grandi di tri-atleta a bin competi contra di otro pa e premio maximo.

E categoria aki e atleta mester a landa un total di 750 meter, core bicicleta pa 20 km y finalisa e competencia cu un 5 km careda na pia. Tambe tabata tin e competencia di Super Sprint, esaki di e hobennan te cu 14 aña cu mester a landa 375 meter, core bicicleta 10 kilometer y finalisa cu 2.5 kilometer core na pia.

Pa loke ta e resultado final di e competencia nos tin cu bisa cu e atleta elite Renze Postma despues di varios competencia ausente a gana e campeonato nacional di sprint marcando un tempo di 1ora y 1min. E hoben prospecto Giannon Eights a logra un di dos lugar overall cu un record personal nobo di 1ora y 2min mientras Romar Arendsz cu a yega na di tres lugar tambe a kibra un record personal nobo ora e la drenta den 1ora y 3 min. Den e categoria femenino, Linda Smith a recupera su posicion number 1 unda e ta finalisa dilanti Amadee Nicolaas y Sandra Postma. Den e relay nos a haya e atletanan Flory KockJonathan Croes y Zhyon Geerman a crusa e finish line como e prome nan.

Den Super Sprint e hoben Justin Morales a yega na di prome lugar den e categoria mucha homber mientras Aleeza Semeleer a yega como e prome den e categoria mucha muher. Den e relay Super Sprint nos ta haya e trio Inald Fernandez Perna, Jeann-Drick Croes y Tyree Koeiman a drenta como e prome team.

Stichting Sportsubsidie Aruba a subsidia e competencia di Sprint y Super Sprint Triathlon organisa pa Aruba Triathlon Association.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.