Diaranzon atardi un delegacion di biyar lo sali pa Argentina unda nan lo competi den e Panamericano di biyar porcierto e campeonato mas grandi di e continente aki. Alrededor di 400 atleta di henter e continente America lo bini hunto pa mira ken lo por yama su mes e miho biyarista Panamericano.
E tres atletanan di Aruba ta esnan cu a gana e derecho di representa nos isla mirando cu nan a gana torneonan local valido pa e clasificacion final pa dicho weganan. E atleta Marc Farro a rank number 1 despues di 6 evento, mientras cu Gunnar Leonardo a rank number 2 despues di 6 evento y tabata Campeon Nacional bola 8 & 10. Por ultimo, e atleta Jason Kock a rank number 3 despues di 6 evento y tabata e Campeon Nacional bola 9. Un pabien sigur na Gunnar Leonardo como tambe na Marc Farro y Jason Kock cu nan titulonan y alabes ta e atletanan di biyar cu lo representa Aruba den e Panamericano di biyar na Argentina. Ta bon pa bisa cu na aña 2002, Aruba a sa na titula campeon den e Panamericano di Biyar teni na Aruba mes unda cu e atleta Ditto Acosta a gana e gran final for di e Luis Miguel Sanchez di Venezuela, mientras su siguiente aña, un bes mas Ditto Acosta ta yega e gran final di e Panamericano di biyar teni na Argentina, pero aki e ta cay venci contra di Jorge Llanos di e propio Argentina y asina keda na un di dos lugar.
Esakinan tabata e miho resultado obteni panos atletanan di biyar den e Panamericano di biyar cu a inicia desde 1999. Lotto, e Loteria di Aruba pa medio di Comision di Subsidio ta subsidia e tres atletanan di biyar pa e Panamericano di biyar cu lotuma lugar na Buenos Aires, Argentina. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
