Exploracion di gas rond di nos isla, ta un oportunidad pa mira si tin en realidad gas of azeta y ta na beneficio di nos isla. E proceso pa determina esaki ta andando di un forma satisfactorio segun director di Compania Arubano di Petroleo (CAP), Armando Curret. Ta spera cu por tin descubrimento, pero e parti positivo ta simplemente cu e trabaonan ta progresa satisfactoriamente.
Timeline
E proyecto ta bay den fase, manera ya ta conoci. E ta parti den 4 fase. Tabata tin fase 1 y 2, cual ta sismica. Fase 3 ta bay tin un proefboring. Final di e fase 3 ta bay tin atrobe un assessment di go of no go, dependiendo di e resultadonan y den fase 4 por tin un otro proefboring. Den caso cu cos sali echt malo, ta bandona e proyecto. Si tin resultadonan positivo, ta sigui pa haci apreasal. Si esey sali bon, ta bay den un fase di desaroyo, pa despues yega na produccion. Ta spera cu esey ta e caminda cu ta bay cana. Pero ta cada bes ta bay paso pa paso. Ta den fase 3 awor aki, manera ya ta conoci.
Fase 4
Esaki tambe ta dura 2 aña y mey. Dus pa 2020, e intencion ta pa drenta fase 4. Si tur cos bay bon.
Si cos bay echt bon y tin un descubrimento, podise por tin mas cu un prospecto den e area. Por bay na un otro prospecto. Fase 4 ta sigui cana separadamente. Ainda ta bay dura un cantidad di aña pa desaroya e veld y pone den produccion. Mester construi un plataforma di produccion, dependiendo si ta gas, bo mester tin un planta, posiblemente onshore, poside offshore tambe pa procesa e gas pa por transport’e. No ta un cos cu ta di un dia pa otro. Ta bay tin un paar di aña mas, prome cu por tin un beneficio financiero, cual ta loke ta interesa CAP.
Por bay pa miho
Segun Curret, tin temponan cu a wordo palabra den e contracto y no por wordo para asina asina. Un cos cu ningun pais kier, pa un compania cu ta contratista bin sinta riba e reservanan y no haci nada. E contract tin su provisionnan pa percura cu e contratista cumpli cu su obligacionnan di trabao.
Un werkverplichting, manera e ta wordo yama. Si tin cu tene cuenta cu por ehempel cu mester bin plantanan pa procesa gas, por ehempel si ta gas cu ta exporta, mester bay tin planta di NLG. Tin cu bay liquidifica pa por transporta e gas. Mercado di Aruba ta mucho chikito pa por absorbe e cantidadnan cu ta necesario pa un proyecto asina, pa un desaroyo di un veld di gas, ta economicamente factibel. Bo tin cu ta realista y tene aspectonan tecnico y economico, cu ta parti di e industria.
