Polisnan a los tiro di advertencia marduga den area di Socotoro prome cu a haci detencion di un sospechoso den Perustraat. E persecusion a cuminsa den e area di Weststraat cu Boliviastraat. Polisnan cu a bay pa un caso sospechoso den e area di Weststraat a mira un homber cu jacket y man den jacket actuando sospechoso.
Polis a bay acerke y el a cuminsa core na pia. Polis a bay su tras mesora y a bise cu mihor e para of nan ta tira. E homber cu man den jacket tabata mustra comosifuera e tin un arma cune.
Ora Polis a menciona cu nan lo tira, el a contesta Polis cu e tambe por tira bek. Suficiente motibo pa e prome tiro di advertencia bay y persecusion na pia. E polisnan di Playa a pidi refuerzo mesora y a bin diferente unidad di Polis na e sitio.
Unidad di Arestatie Team, Flex Team y mas unidad di Playa. Asina a logra pone man riba e sospechoso den Perustraat. A sera e area tambe pa cuminsa un buskeda pa hulls di e agente mes cu a tira pero tambe pa e arma cu supuestamente e sospechoso por tabata tin cune. E departamento tecnico di Polis tambe a presenta na e sitio pa asina acumula evidencianan necesario. E sospechoso a wordo hiba warda di Polis pendiente investigacion y interogacion.
