E cifranan di impuesto pa vehiculo di motor a cuminsa crece. Si compara cu añanan anterior, caminda cu tabata tin posibilidad pa haci pago den cuater paga, esta per kwartaal y compara e aña caminda cambio di ley a drenta na vigor cu ta Januari 2017.

Por compara 16 y 17, por mira un adelanto den pago di impuesto di vehiculo di motor.

Segun directora di departamento di Impuesto, Luenne Gomez-Pieters, por mira si cu tin un adelanto den compliance, esta clientenan cu ta cumpli, pero ainda ta keda un parti, esta e non-compliance cu tin cu atende cun’e y ta purba di concientisa e cliente, e pagado di impuesto cu e mester acudi na tempo, pa asina e evita consecuencianan indesea.

Motibo

Segun Gomez-Pieters, ta tende diferente feedback di e clientenan. Uno ta por ehempel dicon no ta bin cu un plachi di number tur aña, pasobra e ta mas miho visibel cu e cliente a paga of no a paga. Por mira na e plachi di auto cu ta un plachi di number vigente of bieu.

Logisticamente pa otorga un plachi tur aña y mirando e gastonan cu ta trece cune pa loke ta presupuesto di pais Aruba, a dicidi pa bay tambe, mescos cu otro paisnan, otorga un plachi cu ta uno vast. Ta un bes den cinco aña bo ta cambia e plachi.

E sticker a tuma e funcion di e controleplaat. Antes ta conoce e plachi chikito cu ta bisa cu e impuesto ta completamente paga y e ta algo cu ta un metodo pa controla si un hende a paga si of no.

Den futuro, ora bay duna un plachi di number vast, no lo tin mester di e sticker mas. Un di e feedbacknan cu a haya, ta clientenan cu ta bisa cu a paga online, masha facil, pero tin cu bin toch departamento di impuesto pa busca e sticker. E sticker no por wordo manda cu postkantoor? Tin cierto retonan cu tin berdad riba e tereno aki, cu tin cu bisa francamente, no por manda un sticker cu post, pasobra mester ta sigur cu e cliente aki ta ricibi e sticker corespondiente na e plachi di number registra den sistema. Nan lo mester bin zowiezo pa controla e seguro. Pesey tin cu para den rij pa controla seguro.

Feedback cu ta haya ta cu clientenan cu keda cla hopi lihe, a paga online y den menos di 10 minuut a keda cla. Nan a presenta nan seguro, a haya nan sticker y cu nan kwitantie a bay. Otro cliente cu a yega den e delaster siman di pago, a critica cu e rijnan tabata hopi largo, servicio tabata hopi slow. Pero tin cu ta hopi franco cu otro tambe. Si ta yega den e delaster dia di e deadline, pa haci un pago di vehiculo di motor, no ta conta solamente pa esaki. Tin cu corda cu tin otro tipo di impuestonan tambe, cu tin tambe nan reglanan den ley pa pago. Por ehempel e loonbelasting, e BBO, e winstbelasting. E Loonbelasting y BBO ta tur 15 di cada luna. Ta parti di nos cultura, pa nos yega aparentemente riba dia 15 pa haci e pago. No ta percura pa ta mas tempran, manera un dia 10 of dia 12, ora ta trankilo na departamento di impuesto. Pero si tur yega dia 15, naturalmente ta undia hopi druk pa departamento di impuesto y tambe pa e cliente. Ta purba di maneha e situacion miho posibel, dunando un servicio eleva y tambe tratando e cliente, dunando e un trato cu e merece.

Departamento di impuesto kier purba di cambia e comportacion ey. Kier cambia e actitud di pago, caminda cu conciente cu tin deadline nan y cu ta cumpli cu e deadline prome cu e deadline yega. Esey ta conta pa winstbelasting mesun cos. Sa cu dia 31 di Mei, e winstbelasting aangifte tin cu wordo entrega y e pago corespondiente mester wordo haci. Si warda te delaster siman pa entrega aangifte cu jaarrekening, naturalmente tur hende ta core cabes di gay, conhuntamente cu e departamento cu ta purba di duna e servicio. Si mira aña pasa, tabata tempran ora di otorga e paketenan di loonbelasting y BBO. Ya caba den luna di November tabata tin tur cos cla practicamente pa e cliente pasa busk’e. Ora cu aña a bolter, na Januari cu a pensa cu Februari ta yega, tin cu cuminsa bay tin e papelnan na ordo, e ora ey ta core bin busca, bin pidi un duplicado, wak unda cosnan a keda y esey ta trece un presion enorme riba un departamento cu tin cu cana, cu tin cu sigui draai cu entrada y tur otro cos cu ta parti di e proceso.