Ta parce cu e victima a yega cas di e sospechoso pa bende un “bulletproof vest”. Como cu e lo no tabata kier pasobra e kier cambia su bida, a start un pelea y nan a tira riba dje y na final el a kita nan mesun arma y tira nan bek. Investigacion awor ta sigui den full swing pero ta parce cu lo por cay mas detencion na cualkier momento.
E caso di asesinato di diabierna anochi na Rooi Bosal ta hayando un rabo mas largo cu a spera. E prome declaracionnan di e sospechoso y testigonan ta mustrando riba un scenario completamento diferente di e prome informenan.
Testigonan ta conta cu tres homber a yega na cas di pareha di Tilico pa busca su drechi. Tilico mes ta di Primavera pero ta keda cu su pareha y yiu na Rooi Bosal dilanti Rudsen Bar na Santa Cruz.
Parce cu nan bishita no tabata pa hunga domino, manera a informa na un principio. Nan a bin pa bende un “bulletproof vest” cu ta e jacket cu Polis ta bisti bou nan camisa pa proteha nan mes di tiro di arma di candela. Con nan a yega na dje tambe ta un asunto cuestionabel y pio pakico kier bende dicho instrumento uza pa autoridadnan arma.
Tilico lo a bisa nan cu e no kier cumpra nada pasobra el a cambia su bida. Tilico su tata a fayece como 20 aña pasa y su mama algun tempo pasa a fayece den su oficina di bende catochi na Noord. Riba dje di entiero Polis a detene Tilico y a haye cu un arma di candela, pa cual a cere pa un tempo. Na September ultimo el a recobra su libertad y ta purbando pa biba normal bek cu su pareha y 2 yiunan.
Na momento cu e tres hombernan a yega cas pa bende Bulletproof vest, e tabata cu su pareha y yiu. Dado momento nan a cuminsa tent’e y insult’e pa tur sorto di cos pasobra e no kier cumpra e material y/of no kier ta cu nan den e mundo di gang.
Testigo ta menciona cu for di e trio a saca un arma d candela y cuminsa menasa y hasta tiro a sali. Un tiro lo a schaarmaai Tilico na su cabes, esey ta motibo cu el a bay Centro Medico na San Nicolas. Tambe e tin basta sla na su curpa.
Pero ta den e pelea, wantamento y pushamento, el a logra kita e arma di candela di nan y tira bek, pa cual bala a coy Edward “Ponsy” Thiel den pecho. E declaracion di testigo ta cuadra cu e auto cu a baha Ponsy na SEH na Hospitaal y e tres hombernan ta cuadra cu discripcion di testigo. Ta bon pa menciona cu na Hospital a menasa e nursenan, e security guard y hasta e chauffeurnan di ambulance eyfo, cu si Ponsy no scapa, cu lo pasa mescos cu nan!
Di otro banda, Tilico no ta esun di mas bon mucha na cas tampoco. Di acuerdo cu filenan di husticia, Igmar “Tilico” Lares ta naci dia 25 di mei 1989, pues tin apenas 28 aña di edad. Su nomber ta aparece diferente bez den registro hudicial y a sinti castigo entre otro pa portacion di arma di candela.
Aunke e ta bisa awor cu el a actua den defensa propio pa defende su pareha y yiu cu a presencia tur cos, toch na final ta un Hues lo mester determina, cu si den e caso aki, e termino “noodweer” ta aplicabel. Si e por demostra esey na husticia y lo por convence Hues ta un otro asunto. Tambe mester investiga ainda cu si di berdad e arma uza ta di e trio y no di dje. Tambe mester prueba cu si nan a tir’e prome.
E caso aki a ta hopi comenta den comunidad y ta lamenta cu hobennan di un edad asina jong ta anda den e tipo di gruponan asina, ta cana arma y ta haci nan mes culpabel na hechonan criminal serio, di cual por traduci den castigo pisa, di acuerdo cu nos codigo penal.
No ta conoci si e trio cu a bay cas di Tilico tin un historia tambe cu husticia. Riba red social ta considera e victima como un hoben masha keto y bon mucha. Pues ainda mester investiga su rol den e “bishita criminal” na e cas ayeranochi na Rooi Bosal.
