Den weekend ultimo, e unico y mundialmente famoso Domino Square Garden na Kudawecha, esta 99 Bar & Restaurant, a bolbe tene otro exitoso buelta den domino, caminda e biaha aki e “home team” a enfrenta e conosido team di SERO BLANCO BOYS. Hopi ta esnan cu lo a grawata cabes puntra nan mes ta con lo bay hasi cu’n team bakia asina manera Sero Blanco, pero akinan por bisa cu “mas save el chino por chino que por diablo”!! Dr. Han a sa di “hand pick” un team monster for di tur su clientenan y a sa di redusi e poderoso SERO BLANCO na “zo maar een heuveltje”!
Prome cu nos drenta den detayes, mester hasi un rectificacion di nos relato anterior, caminda a comete e error di a lubida di menciona e score final caminda Team SNOR a gana Team CABA COS. E score final tabata 21 – 18 na fabor di Team SNOR, y cu esaki nos ta spera cu Snor por descansa despues di su persecucion incansabel p’e resultado mira lus di solo. Verder por bisa cu no tin mucho novedad den vecindario di Kudawecha, cu excepcion cu awor “de vrije savanne” tin un DJ nobo cu ta cana rond cu’n speaker cu “YIU-ÈS-BI”, tocando “oldies”.
Pues, pa bin back n’e tema, diasabra anochi a cuminsa cu “el teror de Turibana” den “high tension” pasobra su patna “kid Palm Beach” no a yega ainda! Sinembargo asina mes Team 99 a sali manera ariba un octanahe haltisimo, y den un frega di wowo ya a pika bay dilanti cu score di 7 – 1!!! Un golpi cu Team Sero Blanco no lo supera mas. Poco poco por observa Team Sero Blanco ta purba gatia bin bek y half time ta drenta cu score di 11 – 7 na fabor di Team 99. Durante half time, tabata tin reunion nan di urgensia pafo door di Team Sero Blanco, mientras cu paden Team 99 ta ariba un “chill” y ta hari den djente, ya cu e seleccion di “djaka di caña” cu Dr. Han a hasi ta dunando resultado!
Den di dos mitad, e trabuconan di Team 99 a manera rev e motor un paar di RPM mas halto y a manda cos den di 99 speed!! Cu’n velosidad nunca bisto, un tras di otro por a tende e gritonan di “nobentiiiii-nuebeeeeee”, y den corto tempo e anochi ta termina cu’n resultado desastroso y totalmente inespera pa Team Sero Blanco…21 – 11 na fabor di Team 99!! Un sla cu sigur sigur Team Sero Blanco lo bay bin back pa busca revancha cu tur forsa! Un palabra di danki ta bay di parti di Han pa tur esnan cu a colabora na un anochi sumamente alegre y placentero na e unico Domino Square Garden na mundo, esta 99 Bar & Restaurant na Kudawecha.
