Un biaha mas tin un actividad na Departamento di Asuntonan Economico. Zulema Dabian-Erasmus ta hefe di departamento di business development na dicho departamento y ta splica cu nan ta den e di dos dia di e business week 2018 di Exprodesk, unda cu nan ta organisando e tayernan cu ta tuma luga durante Business Week 2018. E interes ta hopi grandi. Nan tabata tin un sala yen di participante.
E tayernan aki ta dirigi na negoshinan chikito y mediano cu interes pa exportacion. Si wak Departamento di Asuntonan Economico, ta organisando diferente di e actividadnan aki y tur e actividadnan aki ta fit cu otro. Algun actividad ta wordo organisa door di IDEA y despues algun ta wordo organisa pa Exprodesk.
Meta
Segun Dabian-Erasmus, si scucha minister di finansas y asuntonan economico y cultura, Xiomara Ruiz-Maduro, ta enfoca hopi riba diversificacion y tambe pa crea actividadnan economico nobo. Tur sa cu banda di esaki tin desaroyonan tecnologico andando cu no tin influencia riba dje y tambe e mindset di e consumidor, ta cambiando. Departamento di Asuntonan Economico ta facilitando e conocimento di con e ora e negoshinan chikito y mediano por deal cu e desaroyonan aki pa asina toch por ta exitoso den haci negoshi na Aruba. Sa cu na Juni, a tene e small business evento cu tambe tabata un exito total y awe tin e di dos dia di tayer, unda cu a papia di E-Commerce.
Kico ta e concepto
Colaboracion ta e concepto cu a keda bin dilanti. Na e Small Business Event a papia di colaboracion entre negoshinan cu experiencia y conocemento den haci negoshi, cu negoshinan cu ta cuminsando, esta e colaboracion entre e dosnan aki. Pa uno ta e mentor di e otro. Awe ta tende di Bionda Fonseca, cu ta e facilitador di e dia di awe, cu colaboracion ta hopi importante entre negoshinan chikito y mediano. Si bo kier negosha tarifa, si bo kier drenta den cierto mercadonan, si bo kier haya cierto licencia, pa asina bo por haci E-Commerce. Asina e Departamento di Asuntonan Economico kier trece e concepto y kier trece e concientisacion di e concepto aki di colaboracion.
E pasonan
Segun Dabian Erasmus, e pasonan ya a caba a wordo tuma door di iniciativanan priva. Esey sigur den pasado tabata tin hopi conferencia riba E-Commerce, riba blockchain, etc. Un biaha mas, Departamento di Asuntonan Economico tey pa sostene tur e proceso, tur e actividadnan aki andando caba. Esaki no ta haciendo nan so. Nan ta haciendo esaki hunto cu un fondo Europeo cu yama Cosme, cu tey pa yuda e departamento, pa en turno yuda e negoshinan chikito y mediano na Aruba.
Awendia cu tur e desaroyonan tecnologico y e cambio di mentalidad di consumidor, ta sigur cu tur negoshi mester sigui innova. Naturalmente esunnan cu ta start, tin cierto pensamentonan innovativo, pero door di e colaboracion cu hasta negoshinan existente, no solamente ora tin intercambio di conocemento, pero tin intercambio di innovacion.
Cambio di mentalidad
Cu cambio di mentalidad por mira cu awor por ehempel Amazon a crece cu hopi hende ta haci nan compras online. Esey ta un cambio, segun Dabian-Erasmus.
