Den e fin di siman aki, riba dianan 9 i 10 di sèptèmber, e viadukto di Arubastraat ta será pa tráfiko. Ta trata di e viadukto bou di A.A. de Lannoy-Willems Blvd for di Arubastraat bai Koningin Julianabrug direkshon Punda .
Esaki ta nesesario pa motibu di trabounan pa drecha un sker den betòn i fèrf na e viadukto. E trabou ta trese kuné ku durante e dos dianan menshoná, entre 8’or di mainta i 5’or di atardi, outomobilistanan tin ku sigui un desviashon si nan ke yega Punda. E desviashon ta marká dor di bòrchinan ku deskripshon di e ruta. Ora e viadukto ta kompletamente será, mester sigui kore te na Ser’i Dòmi, pa, nèt promé ku e lusnan di tráfiko hasi un U-turn pa sigui e kaminda bai Punda. E kontratista ta purba pa minimalisá e molèster pa tráfiko mas tantu posibel. Por fabor tene kuenta ku e kambio temporal den situashon di tráfiko i ku e personanan ku ta hasi e trabou di mantenshon den besindario di e diferente viaduktonan.
