Desde Maart 2018 WHO a clasifica Aruba como un area cu riesco pa Zika, esey ta loke nos tin di compronde for di vocero di CDC (Centers for Disease Control and Prevention) y a accentua cu CDC ta depende riba WHO (World Health Organization) pa informacion di monitoreo.
Sinembargo, e noticia cu a sali den fin di siman, a wordo refuta pa minister di salubridad publico, Dangui Oduber, den un conferencia di prensa cu a tuma luga dialuna cu a pasa, y a catalogu’e como Fake News, referiendo na “medionan local”, cu ta perhuda nos unico pilar economico, cual ta turismo. Esaki a wordo sosteni pa otro “medionan” cu tambe a sa di indica cu nos medio, manera nan sa bisa na Spaño “con nombre y apellido” a indica cu a crea un escandalo y crea un noticia pa hala atencion, sin tene cuenta cu fuera di e informacion cu nos a suministra, ta indica claramente for di ki fuente e noticia aki a bin.
Den revision constante
Contrario na tur e negacionnan cu a tuma luga aki na Aruba, vocero di CDC, y cual instancia cu (un biaha mas) ta depende riba e informacionnan di WHO, a splica claramente kico ta e meta di e informacion cu nan a suministra ultimamente, cual update tabata dia 7 di Augustus riba nan propio website y no algo cu e medio aki a inventa.
Segun e vocero, WHO y e socionan mundial di salud publico actualmente ta revisando e marco pa compronde e riesgo di Zika y ta comparti e informacion aki a medida cu esaki ta disponibel.
A menos cu ta indica lo contrario, e guia di Zika di CDC pa un destino ta aplica na henter e teritorio of pais. Debi cu Aruba ta sigui ta den un area cu riesgo di Zika, hende muhenan na estado NO mester biaha pa eynan. Tur biahero pa Aruba mester (1) evita picadura di sangura y (2) usa condom of no tene relacion sexual pa proteha su mes contra Zika durante e biahe. Mester sigui tuma e precaucionnan aki despues di su biahe pa detene e propagacion di Zika pa otro personanan den su pais.
E partnernan di e hende muhenan na estado y parehanan cu tin planea pa un embarazo, mester conoce e posibel riesgonan pa e embarazo y tuma medidanan preventivo.
Pa mas informacion por bishita e website di CDC riba e siguiente link: https://wwwnc.cdc.gov/travel/page/risk-of-zika-selected-destination
Pa mas informacion riba e clasificacion actual di e pais Zika ta disponibel for di CDC na https://wwwnc.cdc.gov/travel/page/zika-country-classification y for di WHO na http://apps.who.int/iris/bitstream/10665/254619/1/WHO-ZIKV-SUR-17.1-eng.pdf?ua=1.
E proximo actualisacionnan na e escema di clasificacion lo ta disponibel online.
Pa mas informacion riba Zika y loke biaheronan por haci pa preveni’e durante y despues di biahe ta disponibel na https://wwwnc.cdc.gov/travel/page/zika-information.
