Ta encurasha tur hende pa paga luz pa 1 ora

Diasabra dia 24 di Maart 2018 ta e di 11 Earth Hour, cual ta un evento organisa anualmente mundialmente, y un biaha mas Aruba Hotel and Tourism Association (AHATA) ta participa na esaki. Na aña 2007 e movecion aki a inicia na Australia y desde e tempo ey mas di 7000 ciudad rond mundo ta participa den e actividad aki. Earth Hour ta un iniciativa global di medio ambiente di World Wild Fund For Nature (WWF), unda cu individual, negoshinan, gobierno y comunidad ta invita pa paga tur luz y aparatonan electrico pa 1 ora diasabra awo. Ta haci esaki pa asina mustra e sosten na e accion sostenibel di medio ambiente.

 

Diasabra awo di 8:30 pa 9:30pm lo paga e luznan y aparatonan electronico como simbolo di compromiso na e planeta. E tema di Earth Hour di e aña aki ta “Let Nature Shine” y AHATA ta encurasha tur hende pa participa na esaki.

 

E aña aki un biaha mas pa 1 ora largo lo concentra na Aruba pa paga e luznan riba henter e isla. Diferente hotel lo ta pagando luznan no esencial y asina mustra nan sosten na e causa aki. Caribbean Palm Village lo ta pagando su luznan pafo durante e Earth Hour, mientras cu Ritz-Carlton lo ta tene un ‘Earth Hour Moonlight Hike’ pa 1 ora y na final di esaki nan lo tin un señal cendi. Bucuti hotel lo ta pagando tur luz no esencial y tambe a invita tur bishitante pa paga e luznan di nan camber y ta ofrece un bebida special durante e Earth Hour, por ehempel Tropicana hotel lo paga luznan y lo cende bela den un saco blanco yena cu santo y lo pone esakinan rond di e hotel, lobby te na e casino, di cual na mes momento nan lo encurasha bishitantenan pa no cende luz durante e orario di Earth Hour. Jolly Pirates ta encurasha bishitantenan pa no uza cups di plastic y asina aki otro companianan tambe lo ta cooperando cu e Earth Hour 2018.

 

Maneranan añanan anterior, rond mundo monumentonan famoso y grandi un biaha mas lo paga nan luz p’e causa importante aki.