“Di ora mi tabata na estado te fakkel, cu tabata e delaster biaha cu ba pone man riba mi”, asina pareha di Alex Wernet, cu ta un Polis pero na disposicion di Minister Otmar Oduber como su chauffeur y su bodyguard, a skirbi awe diadomingo riba red social. Sherry Ras a conta cu e Polis a lastre riba caminda y despues el a yama su coleganan Polis pa bay cune tur na sanger, sin cu el a mishi cune.
E declaracion di e victima riba red social ta hopi fuerte y ta contene fragmentonan cu ta incrimina e Polis den asuntonan serio, liga na criminalidad. Asina por ehempel e pareha ta garantisa cu Polis Wernet ta menase cu regularidad ora a acuse di diferente asunto. Esaki pasobra e pareha tin tur su combersacionnan cu e Polis tabata bise kico e ta haci y anochi e tabata menasa y intima e pober dama pa e no bisa nada.
Ta papia aki di diferente keho cu a entrega contra Alex Wernet, tanto na Warda di Polis personalmente como via telefon, pero nunca nada ta wordo haci. Sea pa motibo cu e ta Polis of pasobra e ta traha pa Minister Otmar Oduber.
Awe e señora a sigura cu el a entrega keho atrobe na e departamento BIZO cu ta investiga integridad di Polisnan. E biaha aki e pareha a dicidi di pone riba Facebook tambe, bisando “A yega ora pa hende sa Bo berdad. Batido di muhe!!”.
E mesun Polis aki tabata den noticia caba algun luna pasa, ora cu el a bay busca un homber Venezolano ilegal, priminti’e cu si e duna un declaracion contra un persona, cu Minister Oduber lo percura pa e haya permiso di estadia na Aruba. E declaracion ey ta poni riba papel den e rapport cu e Polisnan a traha, ora cu riba ordo di Comisari Trudy Hassell, a bay interoga e ilegal den Bestuurskantoor den fin di siman durante oranan di anochi.
Tambe den tempo di campaña a insinua na mas cu un ocasion cu a señala e mesun Polis aki bentando borchinan abou y cometiendo destruccion y sabotahe. No ta conoci si a investiga e insinuacionnan ey riba red social.
For di fuentenan den Polis, nos a compronde cu e no ta permiti drenta oficina di Recherche pasobra no ta confi’e. Es mas, nan ta acus’e di varios asunto serio, pero cu pa un of otro motibo no a investig’e of persigui’e ainda. Den Polis mes nan ta lamenta cu enbes di investiga e hoben aki, a dune un premio pa mande bay traha como Chauffeur y Bodyguard di Minister.
Awor cu a entrega un keho oficial atrobe pa maltrata su pareha seriamente na cas, ta mira ki paso BIZO, Ministerio Publico y Minister Otmar Oduber mes lo tuma alrespecto.
Si tur cos ta bon, e Gobierno aki ta totalmente contra abuso domestico. Tin por lo menos un Minister cu a acusa su casa publicamente di abuso, te cu a cera e casa pa algun dia.
