E siman aki, un delegacion di Oficina di Turismo Aruba (A.T.A.), a reuni cu diferente oficina di A.T.A. na Merca como tambe diferente di su agencianan pa e mercado aki , unda a cumpli cu un agenda amplio di reunion y otro encuentronan importante.
Algun di e topiconan principal cu a bin riba mesa ta e esfuerzonan di mercadeo cu ta fomenta turismo for di nos mercado principal Norte America.
E grupo di ehecutivonan di turismo encabesa pa CEO, Sra. Ronella Tjin Asjoe-Croes, a sinta den diferente sesionnan cu esnan di A.T.A. Norte America. Alabes tawata presente entre otro e agencia di publicidad pa Aruba na Merca ‘The Concept Farm’ y agencia di strategia di media ‘USIM’.
Tambe a ricibi presentacion di IPSOS, compania di investigacion renombra, cu pa di cuatro aña consecutivo ta conduci un ‘brand tracking’ study pa Aruba. Aki ta midi entre otro Aruba su ‘Brand Appeal’, consideracion pa bishita Aruba compara cu otro destinacion den Caribe, intencion pa bishita Aruba incluso a corto plazo. Kico ta e puntonan cu ta score mas halto pa Aruba, y mas abou, compara cu otronan den Caribe, y asina tin hopi mas aspecto cu A.T.A. ta midi pa asina duna contenido na ‘efectividad’ di mercadeo den e mercado.
A revisa e accionnan tuma y resultado di diferente campaña entre otro resultadonan –te cu awo– di e campaña ‘Authentic Aruba’ y a haci cierto ahustacion na e strategia pa 2018, a base di necesidadnan di e Mercado y socionan, esaki primordialmente considerando locual tin ‘on the books’ bendi pa Aruba te cu awo y unda mester pusha mas. Esaki claro ta mara na capacidad di cupo aereo tambe, a base mensual. Ademas a discuti diferente strategianan tambe pa 2019, y den preparacion pa cu esaki aspectonan cu lo forma parti di un ‘Retreat’ cu ta preparando pa A.T.A. su socionan local. A revisa tambe plan di comunicacion teniendo na cuenta cu temporada di horcan cu lo sigur ta parti di noticia mediante – cuartal tres di e aña aki.
Durante 2017 e region Norte America a representa 69.4% (742.884 turista) di e cantidad total di bishitantenan pa nos isla. En total Aruba a ricibi 695.718 turista for di Merca (323.799 turista a bishita Aruba pa prome biaha) y 47.166 turista Canades di cual 24.498 turista a bishita Aruba pa prome biaha.
A.T.A. Aruba y A.T.A. Norte America, como tambe e partnernan, ta satisfecho cu e intercambio di e reunion fructifero aki. Pa 2018 tin proyecta un crecemento di 3.6% pa Merca y 3.0% pa Canada, resultando den un cremento di 3.6% pa cu Norte America pa 2018. Claro esaki ta tene cuenta cu kier atrae esnan cu tin entrada eleva pa asina por laga mas atras den nos economia. Tambe ta pone enfasis riba e segmento di ‘Millennials’, sin lubida e segmento atractivo y importante di ‘Baby Boomers / Empty Nesters’.
