Recien Aruba Tourism Authority a reuni cu Su Excelencia Gobernador Boekhoudt, na unda oficialmente a presenta e plan ‘Cu Mira pa Futuro’. Ronella Tjin Asjoe-Croes, CEO di Aruba Tourism Authority a duna di conoce cu “Nos destinacion a y ta mira hopi exito den turismo en general, pero e era di desaroyo actual ta rekeri hopi mas atencion riba desaroyo di nos isla, e experiencia cu ta duna e bishitantenan. E biahero ta en busca di experiencianan diferente y unico.”
Durante e presentacion, e proceso cu e ser sigui pa yega na e documento aki, metanan
fiha y accionnan concreto a wordo delinea, variando di accionnan pa stimula inovacion
como tambe accionnan pa duna atencion debido na proteccion di nos cultura, naturalesa
y medio ambiente. Tjin Asjoe-Croes a laga sa cu “Pa yega na realisacion di e plan aki,
mester cooperacion y contribucion di tur participante y organisacionnan relevante. A.T.A.
a facilita produccion di e plan aki, pero no ta lidera tur accion. Esaki ta rekeri liderazgo di
varios otro instancia incluyendo gobierno. Hecho ta cu e plan aki ta un produccion cla cu
feedback amplio y carga cu lo conduci na un desaroyo duradero di nos producto
turistico.”
Aruba ta un isla chikito cu ta depende di turismo pa cu su desaroyo economico. Esaki ta
pone presion riba e recursonan natural y social di nos isla. Pa sigui ta exitoso den futuro,
ta sumamente importante pa guia desaroyo di e destinacion. Ta pa es motibo aki, Aruba
Tourism Authority a facilita e proceso di ‘Cu Mira pa Futuro’ y ta dispuesto pa sigui forma
parti di dje.
A splica na Su Excelencia Gobernador Boekhoudt cu durante un periodo di 10 luna,
A.T.A. conhuntamente cu mas di 350 socio cu ta forma parti di departamentonan
gubernamental, sector priva, NGO’s, studiantenan y e pueblo di Aruba en general a
delinea accionnan segun categoria, importancia, tempo cu lo tuma pa implementa, y
esnan cu mester lidera ehecucion di entre otro e accionnan. E plan ‘Cu Mira pa Futuro’
ta consisti di 5 obhetivo strategico y 22 punto di prioridad cu a resulta den 90+ punto di
accion concreto. Pa cada punto di e prioridad a wordo identifica accionnan concreto cu
lo wordo implementa den e proximo 4 pa 5 aña. A opta pa un proceso participatorio,
‘bottom up’, pa asina tur elemento di e destinacion por wordo revisa di un manera
transparente y interactivo. Hunto cu socionan a logra alinea e diferente accionnan cu ta
rekeri atencion di varios departamento gubernamental y organisacionan priva, como
tambe NGO’s, pa asina sigura cu tur elementonan cu ta toca desaroyo di e producto
turistico en general ta riba e mesun liña cua vision y pasonan cu mester wordo tuma. E
plan strategico y pragmatico, ta conta cu e sosten di socionan y ta di sumo importancia
pa asina por alinea y determina e siguiente pasonan pa haci di Aruba uno mas dushi pa
biba, como tal uno dushi pa bishita.
Tjin Asjoe-Croes a pone enfasis cu mester tuma accionnan consistente y bon calcula pa
asina conserva y proteha sigur 3 aspecto cardinal cu ta forma fundeshi di nos desaroyo
turistico cu ta; nos playanan, nos hospitalidad y e seguridad cu nos destinacion ta
brinda. Cu e obhetivonan y accionnan defini den e plan ‘Cu Mira pa Futuro’, ta aspira pa
conhuntamente cu tur envolvi pone e puntonan cardinal den accion.E desaroyo di e plan ‘Cu Mira pa Futuro’ ta forma parti di A.T.A. su ‘business plan’ pa e
periodo di 2014 – 2017 y ta forma parti di e strategia di maneho di A.T.A. pa tin un rol
mas activo den maneho integral di nos producto turistico, den su capacidad como e
“Destination Marketing and Management Organization” (DMMO) di Aruba.
Ademas di e presentacion, SE Gobernador Boekhoudt a ricibi e Plan ‘Cu Mira pa Futuro’
den forma di un buki. Riba e potretnan por mira mas di e acontecimento di e
presentacion ofreci na SE Gobernador Boekhoudt.
