Summer Camp di YMCA tabata exitoso

YMCA Aruba ta un organisacion non profit cu un mision pa enfoca ariba e bienestar Spritual, Intelectual y fisico di nos hobennan. Un enfoke holistico pa cu e desaroyo di nos hobennan, cu ta simbolisa pe famoso triangulo di YMCA, cual ta representa Body, Mind and Spirit.

YMCA Aruba ta enfoca durante su programanan ariba e desaroyo personal di cada persona traves di 5 diferente balor cual ta Caring, Honesty, Respect, Responsibilty, y Faith. Durante e periodo di Summer Camp, esaki no ta un excepcion. Manera ta custumber, YMCA Aruba ta tene su famoso Summer Camp pa Kids y su famoso Summer Camp pa Youth durante e periodo vacacional. Durante e 4 simannan aki YMCA Aruba ta ofrece un programa varia cu diferente actividadnan den cual nos muchanan y hobennan ta ricibi mas conocemento y experiencia ariba diferente area. YMCA su staf y boluntario no ta enfoca solamente ariba un siman placentero pa e hobennan, sino tambe ta yuda nan cu nan desaroyo personal. E prome dos simannan di Summer Camp ta tras di lomba y por bisa cu nan tabata un exito total! Durante e dos siman aki e mucha- y hobennan cu a participa den e Summer Camp a cera conoci cu e cultura Chines y Africano. Ambos e grupo di Kids y di Teens a participa den un workshop den cual Jenny Hua a siña nan mas tocante e vocabulario, gramatica y Caligrafia Chines.

Ambos grupo a ricibi tambe un Drumming workshop duna pe artista local Mo Mohamed, y un workshop tocante baile Africano duna pa Taiisha Alleyene di Royal Dreams Foundation. E grupo di Youth a ricibi entre otro e oportunidad pa participa den e actividad di Clearbottom Kayaking y Z underwaterviews Aruba a haci esaki posibel, como tambe e oportunidad pa pasa un momento ameno na Splash Park Aruba. Durante cada un actividad e staf y boluntarionan di YMCA Aruba ta enfoca ariba e desaroyo personal y social di e muchanan y hobennan, y ta ofrece nan guia specifico pa asina nan por crece y ta un lider den nos comunidad. YMCA kier a gradici Jean Paul Lacle, kende boluntariamente a tuma tur su tempo pa yuda cu e potretnan. Den e siman di 31 di Juli pa 4 di Augustus 2017, YMCA lo tin su ultimo siman di Summer Camp pa cu aña 2017. Personanan cu ta interesa pa inscribi nan yiu, of un familiar, of cu ta desea di traha como boluntario, por pasa libremente na nos oficina situa na Calabasstraat 1, of na Pastoor Hendrikstraat 55. Pa mas informacion por yama libremente na YMCA Dakota na 5823072 of YMCA San Nicolas na 5845303. Young Men’s Christian Association (YMCA) ta funda dia 6 di juni 1844 dor di George Williams na London, Inglatera. Su oficina principal ta na Geneve, na Suisa. Mas di 57 miyon hende ta beneficia di e asociacion estableci den 125 pais rond mundo.

E lema principal di e organisacion internacional ta empodera hendenan hoben. Bob Steele a funda YMCA Aruba 61 aña pasa door di e necesidad pa bin cu un luga pa hobennan pa evita cu nan lo ta riba caya. YMCA tin como meta pa crea personanan util y habil den nos comunidad pa medio di brinda guia y motivacion, pa asina nan ta un influencia positivo ariba nan contemporaneonan. YMCA ta ofrece diferente actividadnan manera campamento pa mucha, campamento pa hoben, recreacion deportivo manera p.e. volleyball y basketball y otro deporte, como tambe eventonan social. YMCA a cuminsa cu e prome “Tra’i merdia”, yama Y’s Care (YMCA Care) cu a cuminsa na Aruba 27 aña pasa cu un programa di asistencia cu huiswerk y recreo.