Tele Aruba ta sigui cu un debe miyonario, management team actual ta keda y programacion di e canal lo cambia.
Esaki ta algun di e contestanan cu Minister di Telecomunicacion, Chris Romero, a manda pa Parlamentario Sue- Ann Ras (MEP) e siman aki. E parlamentario a haci un serie di pregunta na e mandatario riba Telearuba recientemente, basa riba inkietud cu e tabatin. Segun Ras, e lo sigui cu e proceso aki di haci pregunta por escrito como un di e instrumentonan cu e tin pa por haya claridad riba varios tema.
DEBE NA TELEARUBA
Un di e preocupacionnan cu e parlamentario tabatin ta, e debe cu tin na e canal. E mandatario aki a confirma den su contestanan, cu e canal tin un debe miyonario di 1.3 miyon florin, cu ta gran parti di debe habri y tambe pa falta di competencia di social media. Esaki ta haci e canal menos atractivo p’e comerciantenan y como cu no a haci hopi pa keda ‘up to date’, esaki aparentemente ta afectando e entrada.
PROGRAMACION
Romero a contesta Ras cu ta bay restructura e programacion y separa e programacion di canal 13 y 23. Segun e mandatario a bisa Ras, cu e intencion tabata pa comberti canal 23 den uno turistico y separ’e completo di 13. Pero no sa exactamente con esaki lo funciona y con exactamente esaki lo ta hinca den otro, Ras a sigui bisa, basa riba e contestanan cu el a haya.
MANAGEMENT TEAM TA KEDA
Pa haya clarificacion riba ken exactamente ta maneha Telearuba awor, basa riba e hecho cu a anuncia cu lo pone un team nobo, a resulta cu esaki no ta bay cambia toch. “Gobierno a opta pa no cambia e management team na Telearuba y a laga esaki ‘intacto’ tabata e contesta cu Romero a manda pa e parlamentario. “Esey kiermen cu señor Giovanny Kock y señora Rona Emerencia-Tromp ta keda por lo pronto na timon di e canal”, Ras a compronde. E informacion aki ta un di e contestanan riba e preguntanan di e parlamentario.
TELEARUBA RECOBRA SU BIDA
Parlamentario Ras a mustra cu su deseo ta, pa Telearuba recobra su bida y produccion di antes, unda cu nos propio hendenan tabata produci y ehecuta hopi programa informativo, educativo y entretenido pa tur edad. “Television a cambia radicalmente e manera con nos ta entrene otro, tanto paden como pafo di un hogar y e mester keda algo placentero pa disfruta di su contenido”, Ras a splica. “Television a comberti gradualmente den e medio di comunicacion mas influyente den e desaroyo di diferente patronchi di comportamento di e audiencianan: mucha y adolescente di mundo completo a crece conhuntamente cu e evolucion di mercado televisivo y Aruba a mane keda hopi leu di e evolucion aki,” Ras a finalisa bisando.
