Sue-Ann Ras (MEP): “Savaneta tambe merece di haya atencion pa embeyecemento cu fondo di TPEF”

Durante e reunion publico di presupuesto di Tourism Product Enhancement Funds (TPEF) diahuebs ultimo, Parlamentario Sue-Ann Ras a enfatisa cu e producto turistico ARUBA, no mester ta solamente dirigi riba embeyecemento pa e turistanan, pero tambe nos propio hendenan.

“Den pasado varios bario y districto a conoce por lo menos algun proyecto di embeyecemento, sea chikito of grandi. Esaki ta mehora e apariencia di e area y automaticamente ta eleva e balor di propiedad y satisfaccion di su habitantenan como tambe su bishitantenan”, Ras a cuminsa na bisa durante su disertacion.

Tourism Product Enhancement Fund (TPEF)

TPEF tin fondo disponibel pa embeyecemento y varios proyecto a duna resultado fructifero y exitoso, manera: Arashi, Mangel Halto, Zeewijk, Baby Beach y asina mi por sigui menciona. Cu esaki den mira, mi lo desea tambe pa mi districto di Savaneta yega na turno pa haya poco embeyecemento y seguridad. Tin biaha e opcion menos costoso, cu ta encera cuido y limpieza y agrega algun zona atractivo, lo haci un diferencia grandi. Generalmente embeyecemento di comunidad ta importante tambe, pasobra e ta duna un indicacion, cu nos ta cuida di nos luganan.

Savaneta

Savaneta, particularmente e parti pazuid band’i lama, esta Santo Largo y Curason di Maria ta masha bishita pa su habitantenan como tambe bishitantenan local e internacional. E ta un beach cu sigur ta hopi uza diariamente y mester dun’e poco mantencion y cuido, ya cu lama mes a destrui esaki. Un poco di embeyecemento cu palapa, yena santo blanco bek y algun banki, sigur lo tin su funcion practico pa su bishitantenan.

E caminda di Savaneta banda pazuid, unda tin varios restaurant local masha bishita mes: Zeerover, Flying Fishbone y Old Man & The Sea, ta un caminda largo, unda tin varios hende ta cana den oranan di atardi,  ta un caminda largo, unda e autonan ta core hopi duro mes y varios biaha tin turista y local cu mester cruza caminda. Hasta algun empleado di Maristella ta haci uzo di e caminda largo ey, pa saca nos grandinan den rolstoel pa un canamento den aire fresco. E peticion pa pone ‘polis drumi’ riba e strip largo aki sigur ta na su lugar, mirando cu e forma aki ta obliga e automobilistanan pa baha nan velocidad y asina garantisa mas seguridad pa e peatonnan.

E ‘boardwalk’ di Green Corridor ta caba na Pos Chikito y mirando cu canamento ta un ehercicio cu nos hendenan ta gusta haci, lo ta ideal pa continua cu e ‘boardwalk’ aki tambe den e area patras di Savaneta, unda ful e proyecto di Green Corridor ta sigui.

E area di Mangel Halto tambe a conoce un crecemento den vandalismo tanto contra turista como local. Mester crea posibilidad pa bin cu sistema eficiente di seguridad, pa trece trankilidad pa tur e hendenan, cu ta bin disfruta di e lama eynan.

Mocion

Parlamentario Ras a presenta un mocion pa urgi Gobierno pa presenta un plan di embeyecemento pa Savaneta y e mocion a haya sosten unamimente. Esaki sigur ta un aspecto hopi positivo, ya cu deseo di henter Parlamento ta, pa Savaneta tambe haya su turno pa embeyecemento.

Savaneta ta un districto, unda hopi hende ta recrea y cu sigur kier protega su medio ambiente. Mi ta sigur cu e pueblo di Savaneta merece di por haya e sosten y atencion di minister y cu nan tin e confiansa cu minister actual, Dangui Oduber, lo cumpli cu e deseonan di nos pueblo di Savaneta tambe. Masha danki.