Un aña escolar pa hopi alumno di examen ta tras di lomba y speransa tin ainda pa algun, cu sigur tabatin un fin di siman hopi intensivo di estudio y dedicacion, pa logra pasa nan her examen e siman aki.
Parlamentario pa partido MEP Sue-Ann Ras, tabata docente na Filomena College, prome cu el a bira Parlamentario. P’esey e resultado di examen na un scol specifico, Filomena College, tabata special p’e. “Despues di e tremendo resultado di diaranson atardi, unda cu 85% di e alumnonan di Filomena College MAVO, pues 42 alumno di 52, a pasa nan examen ya den e prome tanda, pocopoco e resultadonan di e otro scolnan tambe a cuminsa bira conoci y finalmente pa di 2 aña consecutivo, Filomena College MAVO ta logra posiciona su mes na di 2 lugar entre e scolnan di MAVO na Aruba,” Ras a cuminsa na bisa.
POTENCIAL
“Hopi biaha, como docente, bo ta sinti, cu nos no ta logrando saca tur potencial di nos alumnonan y esey ta trece cierto sentimento di frustracion, den mi caso sigur. Mi ta sinti y ta convenci cu nos curiculo ta carece di brinda espacio na formacion total di un ser humano, mas ainda den e temponan dificil y desafiante cu nos ta den dje. Un mucha y hoben tin mester di e habilidadnan social tambe, pa logra surpasa cierto obstaculo den bida y no solamente e habilidadnan academico,” Ras a sigui bisa.
Ras ta orguyoso di e tremendo resultado aki di Filomena College MAVO, ya cu manera a indica caba, te cu november aña pasa, ainda e tabata forma parti di e team dinamico y dedica aki y tabatin e funcion di coordinador di klas 4 y mentrix, ya pa 3 aña. “Mi coleganan, specialmente jufr. Leslie y mr. Aroeman ta docente dedica y cu ta traha cu curason pa nos alumnonan, sin laga afo, henter e team di docente, directiva y staf. Mane mi a bisa aña pasa, esaki ta un logro di un team, un team cu ta inclui tambe, e alumnonan, e mayornan y den e caso aki Rotaract. Mi ta di opinion, cu enseñansa mester ta algo colaborativo y cu caracter di tin partner cu responsabilidad social,” Ras a sigui bisa.
MIHO GRADUADO
Un palabra di pabien ta bay na e miho graduado, Martha Law y na e di dos miho graduado, Daniela Perez, cu ambos ta conoci pa tin un carera escolar ehemplar, hopi dedica, consistente y determina pa logra nan metanan pa futuro. Y tambe un palabra di pabien na tur e otro 40 graduadonan, cu tambe a demostra cu si tin perseverancia, disciplina y motivacion, bo ta capaz pa logra pasa bo examen den e prome tanda caba. Y sin laga afo, un palabra di gradicimento y pabien na henter e team di Filomena College MAVO y Rotaract, pa nan trabou y dedicacion cu nos hobennan. “Na e otro alumnonan, cu ainda tin her pa haci e siman cu ta bin, no rindi y duna 200% di bo, pa asina logra haya bo diploma ainda”, Ras a finalisa bisando.
