E no ta un problema cu a cuminsa awe, pero berdad cu ultimo lunanan a bay for di proporcion. Ta trata aki di e cantidad di stranheronan cu sea a yega Aruba cu boto den forma ilegal of cu simplemente a bin cu avion como turista pero no a bay bek. E grupo aki ta mas o menos 10% di henter nos poblacion!
Tanto AVP cu a baha aña pasa, como e coalicion MEP-POR-RED cu a asumi gobernacion na November aña pasa ta hungando “struisvogelpolitiek” cu e tema aki. Ta pesey nos ta bisa, e ta un “problema latente” cu tardi of trempan lo mester un solucion.
E pregunta di cuanto hende tin “ilegal” na Aruba, ta un misterio. Na januari 2018, durante un entrevista via television cu Prensa Hulandes, Minister Presidente Wever-Croes a bisa cu algun luna prome nan a yega di bis’e cu e cantidad ta rond di 12 mil hende. Cu e situacion explosivo na Venezuela, hopi ta pensa cu awendia e cantidad lo a hasta aumenta!
E realidad di henter e discusion ta si cu e personanan aki ta bibando aki, probablemente pa algun luna y den otro caso, pa algun aña caba. No a sinti un problema grandi den mercado laboral, ni tampoco den nos economia. Bisando esey, expertonan riba e materia ta considera cu nan a “integra” den nos sistema masha dia….cu e unico problema cu nan NO ta aportando!
Y e unico motibo ta cu Gobierno(nan) no kier duna nan e titulo di estadia legal riba nos isla. Politiconan ta teme pa perdida di voto of cu legalisacion di e grupo di hende aki lo causa caos den nos mercado laboral. Pero si e hendenan aki tin añas of lunas caba riba nos isla, ta mas cu claro cu nan mester ta trahando caba of tin un forma di mantene nan mes.
E problema grandi ta cu a priminti e hendenan aki den campaña 2017 cu lo legalisa tur nan estadia y lo otorga nan un permiso di trabou, como parti di un programa di “Amnistia” cu e Gobierno nobo di MEP lo introduci. Glenbert Croes, awendia Minister di Asuntonan Social y Labor a haci e promesa ey den un video cu el a publica riba red social. Awe MEP tin masha problema pa por para pa nan promesa, specialmente pasobra maneho di integracion ta resorta bou di nan colega di coalicion, esta partido POR.
Pa e partido na mando, MEP, e susedido awe tabata un sla duro y un paso atras den e relacion cu ta purba drecha cu e stranheronan riba nos isla. Den pasado Prome Minister Nel Oduber a yega di bisa nan cu “no hay cama pa tanta gente” y na un otro ocasion a pidi nan pa “bay bo pais”. E tendencia anti-stranhero cu MEP a haya como stempel a hinca nan den basta problema pa convence e mercado ey den campaña electoral. Cu esey den mente Glenbert Croes a opta pa priminti nan un cambio den e forma di trata nan, pero a haya un baño di awa frieu den su mesun partido y di su mesun lider.
Hecho ta, cu Gobierno mester tuma un posicion den e asunto aki. Si opta pa keda den “neutral”, e ora e stranheronan aki tur lo sigui ilegal riba nos isla. Nan lo traha “zwart” sin paga impuesto, nan lo goza di nos infrastructura, di nos cuido medico, nos educacion y tur otro beneficio, sin cu nan ta aporta. No pasobra nan no kier, sino cu nan no por. Di otro banda, si opta pa persigui nan y deporta nan for di nos isla, anto ta hopi placa lo mester inverti den Warda nos Costa y Polis, sin conta pasashi cu aerolinea pa por manda mas di 10 mil hende bek pa nan pais.
