Dia 27 di April, diabierna awo, un y tur ta invita cordialmente pa bin Stichting Eliezier na Paradera pa nan opendag. Gino Frans, director di e fundacion a splica cu un y tur por bin mira con nan ta trahando y haya tur splicacion.
Alabes nan lo bende lechuga pa prome biaha na pueblo di Aruba. Tambe lo bay tin cuminda, coremento di cabay y alabes, si bo kier informacion con pa drenta den e cas di nan, ta haya tur contesta e dia ey.
Ki ora e lo cuminsa
Frans a comenta cu e evento lo cuminsa pa 9’or di mainta pa 2’or di merdia.
Mas pa ofrece
Fuera di e evento, nan tin mas cos pa ofrece. Grandi y chikito por tey. E luga ta kindervriendelijk. Tur diadomingo tin hopi mucha ta bin bishita e centro. E dia aki tambe ta special. Ta pone cabaynan core rond y tambe por cana den nan parke. Ta un parke cu nan ta cuida y tin pinturanan di indjan masha bunita cu por mira. E luga no ta solamente pa adiccion, sino e ta tambe un parke turistico.
Un Arubaanse Boerderij
Centro Eliezier ta un Arubaanse Boerderij. Nan tin hoi bestia conoci na Aruba. Nan tin cabay, porco, gans, pauwis. Ta un cunucu Arubiano di e tempo aki cu tin plantacion. Bin pa bo disfruta di e Cunucu Arubiano aki. Alabes e ta un recovery farm, un luga caminda e persona ta bin traha ey riba como forma di terapia, nan ta bin cambia nan bida y haya tambe e palabra di Dios.
Farm
Den e farm nan a planta lechuga. Apart cu nan ta bende esakinan, nan lo mustra con e proceso ta. Nan ta haci uzo di aquaponics. Un compania Hulandes a inverti den nan. E intension ta pa e bira un programa pa ora cu e persona bin biba den e centro, despues cu e rehabilita completo, e ta haya trabao eynan.
E proceso di cultivacion ta haci cu den cinco pa seis siman tin un lechuga cla pa bende. E placa tambe ta yuda pa sigui cu e trabao. Nan mes lo subsidia nan mes. Esey ta e intension di e stichting.
Con pa yega
Pa yega na Centro Eliezier Paradera ta facil. Nan ta ubica na ex Rancho Los Compadres. Si coy e caminda di Pacifico Paradera, ta drenta den e caminda bay direccion Jaburibari. Manera cu drenta e caminda, lo tin un borchi despues di 200 meter mas of menos. Mirando cu ta dia di Rey, lo pone blaas pa esnan cu kier yega eynan. Tambe lo tin bandera cu lo indica mas lihe pa por yega. E ta un bon dia pa famia completo pa forma parti di e actividad aki. Ta algo tremendo pa bin pasa bo dia na Centro Eliezier.
Diabierna, pueblo di Aruba, grandi y chikito, ta invita pa bin e centro, unda cu nan lo haya tur informacion con e centro ta hinca den otro y con nan ta pone e adicto di droga bek riba e caminda corecto. Muchanan por pasa un rato masha agradabel mes. Di 9’or pa 2’or, diabierna, dia 27 di April, Dia di Rey, bo ta mas cu bon bini na Centro Eliezier.
