Departamento di Cultura tambe tabata tey presente hunto cu Exprodesk. Stanley Dabian, vocero di DCA a menciona cu e parti di e Departamento di Cultura ta cuminsa for di inicio di e Unidad aki di DEZ, cual ta Exprodesk, pasobra e ta trata di creatividad y exporta expresion. Esey tin di haber cu tur tipo di artista. E poeta por ta inclui, e bailarina por ta inclui, e musica por ta inclui, e escritor, e graphic designer. Door di esey DCA ta envolvi riba e tereno ey, pasobra ta trata e parti cultural y e parti creativo. Pa esey, tur e serienan aki di tayer ta pa formacion di e artista.
Hopi biaha un artista tin un talento. El a cuminsa crea hopi obra y tin ora e no ta para un rato keto, pa mira cuanto cos e por haci rond di esey. Pero e no ta paga tino riba e parti administrativo, no ta paga tino riba contract, e parti huridico. E no ta paga tino riba belasting of kico. E ora ey, tur e tayernan aki ta pa yuda e artista den su formacion y haci’e conciente cu e ta un mina di oro y cuanto e por haci cu su creatividad, cu mañan su creatividad por ta exporta. Y cu Aruba por ta conoci mundialmente. Den e ultimo dianan aki, tin algun di nos artistanan ta haya bon oportunidad den exterior. Pesey ta envolvi den e desaroyo aki. Pasobra e ta hopi importante pa haci nos artistanan conciente den tur ramo creativo. Artesano, e poeta, e musico, e escritor.
Tabata tin diferente disciplina cu tabata presente. Varios persona a presenta y ta hopi contento cu mas y mas nan ta bin na e tayernan aki y cu ta yuda nan den nan formacion completo. Pa mañan nos artistanan por ta conciente.
Tabata tin tayer unda a trata riba website, riba e parti tecnologico, con pa brand bo mes. Esun di otro siman, dia 24, ta bay trata netamente e cos di belasting. Ora cu berdaderamente loke bo ta ricibi y bo productividad ta wordo manda afo, con pa tene cuenta cu belasting. Esaki ta pa kita e miedo di nos artista di bira grandi.
Wake up pa artistanan
No directmente esaki ta un wake up, pero si e parti di esaki cu Exprodesk y Departamento di Cultura kier logra, pa artistanan bira conciente pa nan por aumenta nan capacidad, nan conocemento. Tur elemento y factornan cu ta hunga rond di e parti artistico. Tur cos cu ta rond ta conta a nan tambe. Por ehempel si bo ta traha un remedi mañan, bo a trah’e pa yuda un hende su salud, pero bo no a tene cuenta cu bo tin cu haya un hende pa diseña un label p’e. Bo tin cu pone den un envase pa bend’e. Bo tin cu wak con ta deal cu douane pa export’e. Tur e contractnan cu tin cu traha cu hende. Tur e tayernan aki ta prepara hende pa su obra artistico, con mas leu e por hib’e. Pero enrikece su conocemento pa deal cu tur e parti rond di e producto artistico, segun Dabian.
