STA ta pidi Aviation Security pa cuminsa actua na serio cu su trahadornan

For dia 31 di Maart 2017, STA a gana e referendum pa representa e trahadonan di Aviation Security NV. Loke ta inaceptabel ta caminda cu tin 54 trahado cu ta traha pa e compania aki, pero ningun di nan tin un contracto individual firma cu e compania.

Segun Diego de Cuba, loke ta pasa, consecuentemente e compania ta haci y deshaci cu nan na nan antoho y e no ta sano pa AAA tampoco. E hendenan aki ta laborando riba tereno di AAA NV. A hala atencion di Jim Fazzio riba e asunto aki. Te hasta, a manda carta pa gerencia di AAA pa hala nan atencion cu e situacion aki ta explosivo y por rementa un ora pa otro riba aeropuerto. Por imagina cu e hendenan aki, nan ta riba contract cu nan ta yama nan bin traha un ora, manda nan cas, nan ta keda cas of keda hang around 4 ora, despues bolbe traha 1 of 2 ora. Esaki no ta e sistema mas saludabel cu tin. No por laga un compania asina aki opera riba aeropuerto.

Sea cu e ta cuminsa actua na serio, e ta firma contractonan individual of e ta firma un contracto colectivo cu e sindicato cu ta representa e trahadonan y ta duna e trahadonan aki locual cu nan merece berdaderamente y no manera ta pasando awor aki.

E mas tristo ta cu tin buraco den nos leynan, cu ta permiti e hendenan aki haci e bochincha aki. A bisa cu esaki lo bay hala atencion di minister di labor. Tambe a splica minister Dangui Oduber tambe, den un voicenote kico ta pasando, pasobra kier pa e ministernan concerni ta na altura tambe di tur e bonchinchanan aki cu ta pasando. Ta cosnan cu no por continua.

E hendenan aki ta wordo intimida, maltrata, persigui. Unda nos na Aruba por continua cu companianan asina aki y pio ainda, ta permitiendo nan labora riba nos teritorio di AAA NV. Kico nos ta bezig cun’e. Kico ta bezig cun’e aki na Aruba? Esclavitud moderno, e sindicalista a cuestiona.

Ta cosnan cu tin cu wordo para. No por continua asina. Nos pais ta hopi chikito. Si e director di e compania aki, rabia cu un di e trahadonan aki, ta castigo nan ta haya. Nan ta baha nan oranan di trabao. En bes di haya 6 ora pa traha pa dia, ta bah’e 2 pa 3 ora pa dia. Compincheria tambe ta existi den e compania aki.

Un situacion absurdo y inaceptabel, 54 empleado trahando den un compania asina aki, tin di soporta tur e clase di abusonan aki, hendenan cu tin yiu pa cria. Nan tin debe pa paga, nan tin cas, nan tin auto, awa, coriente, telefon, cuminda. E cosnan aki no por acepta nan. Mester bin cambionan radical den nos leynan laboral. Cambionan grandi tin cu tuma luga.

Minister mester sali dilanti y bisa cu asina aki companianan no por opera riba teritorio di AAA NV. Segun de Cuba, a trece esaki dilanti na oido di mediador di gobierno. E na su turno a bisa cu e lo bay pidi gerencia di AAA NV pa bin na mesa tambe conhuntamente cu STA, pa trata di sali for di e situacion aki y regla algo drechi pa e hendenan aki. No por ta asina cu tin hende cu ta traha pa e compania aki, nan ta manera zwerver riba aeropuerto. Tin mas compania cu ta echando baina riba tereno di AAA NV.

Den e caso di Aviation Security, ta increibel, inaceptabel, con e hendenan aki ta wordo maluza, maltrata. Si nan traha 8 ora pa dia, nan keda traha overtime di 4 ora, nan no ta wordo paga. Si nan ta gana 10 florin pa ora, si nan traha 12 ora, ta 120 florin nan ta gana pa dia. Di esey bo tin cu conta cu 30 porciento ta bay na belasting tambe. E hendenan aki no ta paga nan AOV, no ta paga nan AZV, nan loonbelasting. Nan no ta paga nan pensioen. Pensioen ta algo obligatorio masha tempo. E compania aki ta viola leynan laboral constantemente y ningun instancia por boet nan. Pakico nos tin ley, e sindicalista ta cuestiona. Tin boetnan cu ta core den 250 mil, pero ningun hende ta para den nan sapato y cuminsa aplica y ehecuta e multanan aki. Dia cu e multanan aki cuminsa cay, e ora e bagamunderianan aki na Aruba ta caba. Tanten cu multanan no cuminsa cay, pa e hendenan aki, lamentablemente tin hendenan asina desgraciado riba e pais aki ainda, cu sa con pa maltrata nan trahadonan. Ta esunnan cu ta trece placa paden den caha pa nan. Tanten cu e multanan no cuminsa cay, e situacionnan aki ta keda na pais Aruba. Tin mas caminda cu tin di e bainanan aki y e bonchinchanan aki cu ta pasa. Pero tanten cu no bira vigilante y no cuminsa ehecuta e multanan manera debe ser, e pais aki ta keda bay den un abismo. Un abismo di esclavitud moderno, y e cheaplabor lo keda asota nos aki riba.

Pesey ta bay trece e punto dilanti seriamente na minister di labor. Den e caso aki ta bay informa minister di transporte riba e asunto aki. Ta inaceptabel cu un compania asina aki, ta haci asina cu su trahadonan y riba tereno di AAA NV cu ta un compania cu ta 100% di gobierno como accionista.

A manda carta caba pa mediador, pidiendo intermediacion. E lo a cana su caminda caba. Ta spera un contesta di dje a corto plazo. Ta spera cu pronto por sinta cu e partidonan na mesa, pa trata di sali for di e impasse aki lo mas pronto posibel, segun Diego de Cuba.