Dialuna a tuma luga e di tres wega di e play-off best of 5 entre Red Machine y Atco Indians den e campeonato di baseball AA, di cual Red Machine tabata ariba den e serie 2-0.
Director di Fundacion Lotto pa Deporte (FLpD) sr. Di-Stefano Wernet tabata presente e anochi aki pa asina habri e di 3 wega di e serie. Na final di e campeonato di ABBA AA 2016/2017 Red Machine a titula campeon pa di 3 aña consecutivo, despues di a gana e di 3 wega.
E anochi a inicia cu Giliane Wester, kende a canta e Himno, unda cu prome cu wega director di e fundacion, sr. Di-Stefano Wernet a entrega power banks personalisa di FLpD na presidente di Aruba Baseball Bond Amateur (ABBA), Sherwin Howell y Giliane Wester. Di-Stefano Wernet a tira e prome bala di wega pa asina duna inicio di wega 3 entre Red Machine y Atco Indians. Na mes momento Di-Stefano Wernet a haci entrega di Power bank.
St. Fundacion Lotto pa Deporte tabata contento di por a presenta e play-off entre Red Machine y Atco Indians, pa mira e resultado di e wega. E fundacion tabata hopi contento cu e directiva di ABBA bou encargo di Sr. Sherwin Howell, e deporte di baseball a rebiba bek aki na Aruba. Nan ta conta cu e sosten di FLpD pa asina nan por sigui progresa, asina Sr. Di-Stefano Wernet a indica. “Mescos cu nos a yuda den futbol cu e ABC Cup na Boneiro, nos ta dispuesto conhuntamente cu Sr. Sherwin Howell y su ekipo pa por yuda baseball”, el a indica. Baseball ta un deporte hopi importante na Aruba, di cual semper e tabata uno cu tabata crece. Ban padilanti cu Aruba door di haci deporte, pasobra e ta trece unidad. E no ta trece division y distincion, pero unidad y forsa ta loke mester den deporte pa asina bay dilanti, Sr. Di-Stefano Wernet a elabora.
Presidente di ABBA, Sr. Sherwin Howell a expresa cu nan a cuminsa cu e campeonato di AA den luna di Augustus y dialuna a tuma luga e di 3 wega di e play-off. E campeonato di baseball a cuminsa den tur categoria rond Aruba, unda cu mester a mira con e resultado di e campeonato lo termina. St. Fundacion Lotto pa Deporte ta manda palabranan di pabien pa Red Machine cu a gana Atco Indians cu e score di 4-2 pa asina titulo campeon pa di 3 biaha consecutivo.
