E dos sospechosonan aki ta deteni of a wordo deteni diaranzon anochi. Aki ta trata di Erwin Hudges y Neythan Oseana. Ta sospecha ambos di pocision di arma di candela y tambe intento pa horta den cas na Bruinewijk.
E agente fam C a sali pa atende cu nan y a haya dos tiro. Uno cu a raspa su brasa drechi y otro cu a perfora su pia robez. E mester a wordo opera mesora na yegada na Hospital pa asina saca e bala for di su pia. Despues di acumula informacion, e polisnan a bay na dos adres. A bay Savaneta 528 unda a detene eynan Erwin Hudges. E buskeda no a termina pasobra a busca e otro sospechoso tambe cu ta biba na Brazil 90. Arestatie Team, Polisnan Uniforma di Playa, Santa Cruz, K-9 Unit y otronan a duna un man. Polis di Barrio di Playa tabata e prome cu a yega na e sitio y asina acumula hopi informacion valioso pa coleganan ranca sali mesora riba un buskeda.
E tipnan duna na Polis tabata importante. Despues di haci ambos detencion na e dos adresnan, a listra full den cura y den e cas mes cu autorizacion di fiscal. No a topa cu e arma of armanan. E dos sospechosonan parce tabata wordo vigila caba pa Polis. Hasta ta wordo bisa cu nan tin un talento den canto y sa participa den cierto training of eventonan na San Nicolas mes. Den Savaneta tin hopi kiebro ultimo tempo y autoridad a tende di nan dos. Awor e colega agente a bay pa atende cu nan riba e kiebro den Bruinewijk y nan a tira e Polis na civil cu e dos balanan. Pronto recuperacion sigur nae agente Policial. A tuma nota cu e hefe di Polis na San Nicolas y tambe Alto Comisario di Polis a manda alabranan di gratitud na tur e polisnan cu a haci un esfuerzo den e caso aki pa finalmente tin e dos sospechosonan tras di trali.
