Awe tardi Ministerio Publico a informa cu a detene un homber den e caso lamentabel di asesinato di e hoben S. Sierra na november ultimo. Ta algun dia pasa nos a adelanta caba cu Polis tabatin e caso cla y cu un ora pa otro lo detene e sospechoso. Nos a informa siman pasa cu e caso ta delicado y cu e sospechoso ta masha cerca mes. Awe nos a haya confirmacion cu e sospechoso ta e homber Jairo A. Chalgut di 47 aña di edad.
E parti delicado di e caso ta cu e homber aki ta(bata) pareha di e tanta y como tal ta consider’e un hende cerca y yega na e famia. E motibo cu a conduci pa e maltrata e hoben di e forma cu el a haci te cu el a fayece, no ta conoci ainda. Awor cu e ta encarcela e recherchenan lo cuestion’e riba e sospecho cu tin riba dje y di su silencio pa 3 luna largo, comosifuera cu Polisnan lo no yega na dje y cu e lo no cay cera.
E sospechoso aki ta un conoci di husticia, pasobra na augustus 2009 a detene, despues cu el a huy di prizon na Aruba na juli 2001. El a regresa despues di 8 aña bek y a cere na KIA pa e paga pa su castigo impone.
Diahuebs mainta pa 11or, Ministerio Publico a yama un conferencia di prensa pa splica mas di e caso aki. 24ora.com lo ta BIBO pa nos usuarionan por sigui e caso di cerca y pa tende dicon a tarda 3 luna pa yega na e sospechoso y kico ta e motibo cu un hende asina yega na famia ta comete un atrosidad asina!
