E compania Alpha Printing maneha pa Ralph Maduro como director, kende ta socio y amigo di Otmar Oduber, ta responsabel pa un entrada di Afl. 272.636,= entre aña 2013, 2014, 2015 y 2016. Pa casualidad, a lanta e compania dia 28 di september 2012 specialmente pa por atende cu printing di sticker.
Documentonan cu a sali ta mustra cifranan y gastonan di e compania nacional di transporte, ta mustra cu Alpha Printing ta un di e gastonan di mas halto den e compania, cu de facto ta casi bancarota, si no ta pa e inyeccion financiero di Gobierno.
E asunto aki ta bira mas serio, ora tene na cuenta cu pareha di Ralph Maduro, tabata representa Gobierno den Hunta di Supervision di Arubus. Natasha Roga siendo den Hunta di Supervision tin acceso na informacion, na tumamento di decision y por influencia direccion cu e compania di transporte ta hiba. Den esey ta duna trabou directamente na su pareha, pa cual ta motibo mesora pa sospecha cu esaki ta un asunto di conflicto di interes serio.
E documentonan ta demostra con e gastonan aki ta hinca den otro, specialmente mirando cu tin indicacion y sospecho di enrikesemento personal di e amigo cerca y alabes socio di ex Minister Otmar Oduber. E compania aki ta por lo menos un di e formulanan di entrada di Ralph Maduro, sin conta otro companianan riba nomber di su pareha y su tata, cu ta traha cu specialmente departamentonan y companianan estatal cu tabata resorta bou di e Ministerio di Otmar Oduber.
Separa di Arubus, ta analisando mas compania di Gobierno, pa mira unda mas ta nota gastonan halto, cu lo por lanta e sospecho di abuso di gastonan halto riba cuenta di Gobierno dedica exclusivamente na companianan masha cerca na e amigo di e mandatario, cu despues di 2009 a tuma su compania over, manera Otmar Oduber mes a bisa publicamente.
