Durante rueda di prensa di e siman aki mi a reacciona ariba diferente ponencia di parlamentario Richard Arends pa loke ta trata finansas publico y minister di Finansas y Economia.
Den medionan di comunicacion skirbi Richard Arends ta remarca cu su Gobierno a baha e deficit di Pais Aruba te na -0.5% na 2017 y cu nan a cumpli cu e norma stipula. Ariba e punto aki sigur mester corigi sr. Arends pa e solo echo cu esaki no ta cuadra cu realidad.
Mi ta kere cu pueblo ainda por corda cu na final di 2017 den Parlamento a keda trata e presupuesto supletorio pa aña 2017. Un presupuesto cu a indica y subraya e tristo realidad di un maneho financiero desastroso hiba pa Gobierno di Mike Eman. Un presupuesto 2017 cu contrario na loke sr. Arends ta indica, tabata rekeri un nota di cambio pa presenta e situacion financiero real cu nos pais ta aden. Contrario na e informacion cu e presupuesto tabata conforme e normanan prescribi pa e ley di supervision financiero temporario, caminda supuestamente lo a cumpli cu e normanan di un deficit di -0.5%, cu ta equivalente na -25 miyon florin, den Parlamento nos a keda confronta cu e tristo realidad cu nos tabatin un deficit adicional di -130 miyon florin. Sr. Arends ta bon na altura di esaki. Podise e no tabata di acuerdo cu loke a keda presenta pero awe esey ta nos realidad. A cera aña 2017 cu un deficit di -3.1% y no a cumpli cu e norma stipula.
Un realidad cu a keda premira tambe pa CAFT. Den nan carta fecha 24 di november 2017, despues cu nan a tuma nota di e di tres reporte di entrada y gastonan di Pais Aruba pa aña 2017 nan a indica cu e deficit di Pais Aruba na e momento ey lo ta -3.3%. Alabes nan a indica cu ni si e entradanan pronostica den e reporte aki di e.o. winstbelasting, settlement sum di Valero y e venta di FMSA concretisa, nan no lo ta suficiente pa logra e deficit stipula di -0.5%. Y awe nos sa cu e entradanan aki no a keda realisa tampoco.
Aruba ta para dilanti retonan grandi, ta rekeri curashi y determinacion pa logra sanea nos finanzas publico. Mas cu tur cos mester stop di crea disturbio y malinforma pueblo y enberdad presenta posibel solucionnan cu aparentemente mientras nan tabata den gobierno nan no por a presenta y realisa pero awor nan tin nan na monton.
