Diamars ultimo, dia 16 di januari 2018, Minister Otmar Oduber tabata den Parlamento pa
trata e PPP proyect Green Corridor. Minister Oduber a bin splica Parlamento di e situacion
precario di crisis cu el a bin haya e proyecto Green Corridor aden na fin di 2017.
Alabes, no obstante e echo cu e falta hopi informacion, el a purba di duna Parlamento un bista di e posibel consecuencianan financiero, tecnico, huridico cu e proyecto por ta aden actualmente. Un di e consecuencianan ta e informacion cu e financiadornan a pone un fecha di ultimatum pa e proyecto Green Corridor esta 18 di januari 2018, caminda nan ta urgi Gobierno pa yega na un solucion p’asina evita posibel consecuencia financiero pa Pais Aruba.
Sigur e situacion di crisis aki no a bin cay for di cielo. For di un memo cu a keda traha door
di PWC pa Minister Oduber fecha 15 di januari 2018 nos por a tuma nota cu desde januari
2017 e proyecto tabata den ‘verhoogd risico’ y poco poco di e fase aki a bay pa un situacion
di ‘at risk’ y a termina den un situacion di crisis.
E situacion aki a conduci cu e Minister
actual no tin nada otro pa haci cu purba di scapa loke e por scapa pa pais Aruba. P’esey
durante su presentacion el a bisa: “Damn if we do, damn if we don’t”.
Pa referi na algun conclusion di PWC:
Desde oktober 2016 a keda indica cu e proyecto no ta keda maneha conforme principionan di un
DBFM (Design, build, finance, manage) contract, ni door di CIC, ni door di DOW;
Falta di conocemento riba e tereno di SCB (systeemgerichte contractbeheersing);
Falta di conocemento na DOW encuanto SCB;
Tin un risico grandi cu e calidad di trabou realisa pa CIC no ta cumpli completamente cu e
exigencianan prescribi den e DBFM contract;
CIC no tin e ‘Deviations process’ y e ‘validatie- en verificatieproces’ na ordo conforme e DBFM; Tur e puntonan aki a conduci cu ya for di januari 2017 PWC ta indica cu CIC no ta ‘in
control’ mas di e proyecto y cu e proyecto ta den un situacion riesgoso. Loke Aruba completo mester puntra ta: Dicon Minister Sevinger no a actua na e momentonan crucial aki? Dicon Minister Sevinger a laga e baca hoga? Oposicion na e momentonan aki kier desvia e atencion for di e problema cu Aruba ta aden door di bisa cu e brug a hisa calidad di bida, cu famianan ta resta mas tempo, etc. Pero esey no ta e discusion. Situacion ta cu a keda demostra cu Minister Sevinger no a tuma accionnan necesario na tempo p’asina percura cu ta cumpli cu e proceso describi den e DBFM contract. Esaki cu tur posibel consecuencianan (financiero, tecnico etc) desastroso. Un situacion cu sigur por a keda preveni si Minister Benny Sevinger a haci su trabou responsabelmente y na un manera transparente y serio.
Lastimamente durante di reunion na lugar di duna splicacion di e situacion cu el a laga atras,
y duna su aporte na busca un solucion, a dicidi di duna splicacion di e prome fasenan di e
proyecto, esta te na e caminda cu e contract a keda cera. Purba tapa solo cu un dede
lastimamente no ta saca Aruba for di e problema grandi cu el a hinca nos aden. Otro sucedido durante e reunion publico cu a indigna mi y cu sigur ta un berguensa ta e echo con sr. Sevinger den bos alto y na un manera masha arogante ta durf di bisa: “I don’t give a damn!’. Indicando na mesun momento e pakico nos ta den e situacion cu nos ta actualmente!
Mirando e situacion presenta na Parlamento, Fraccionnan di MEP, POR y RED a duna
Minister Oduber mediante un mocion e apoderacion pa inicia cu negosacionnan necesario cu
Caribbean Infrastructure Company (CIC). Asina Parlamento ta crea e espacio pa Minister por
bay inicia e fase di ‘Damage control’ y bin bek Parlamento prome cu e tuma cualkier
decision. Sigur ta di aplaudi e iniciativa tuma pa Minister Oduber pa bin informa Parlamento
y pueblo di e situacion hereda. Alabes Minister ta crea e espacio pa Parlamento por haci su
trabou debidamente. Trahando na un manera serio y transparente sigur nos ta cumpli cu
reglanan di bon gobernacion.
