Segun secretario general di SEPPA, Magaly Brito, a comenta cu e sindicato lo bay topa cu su miembronan. Riba insistencia di tur e miembronan, pasobra a tuma nota di un presentacion cu e minister a duna na diferente instancia, schoolleiding, etc. y ta tende via cabesantenan, ta crea tambe duda, cu ken ta papia e berdad. Nan tambe ta haci e peticion pa nan tambe ricibi’e. A acerca e minister como tal pa duna un presentacion na tur hende, pa na un manera habri tambe scucha e version di e minister, di gobierno, pa asina eynan tambe por fiha nan posicion. E forma aki ningun hende por bisa despues cu un opinion ta wordo imponi riba nan, of nan ta haya e informacionnan diferente, cual e sindicato por a haya na mesa.

Eliminacion di DPS

 

Si mira bon, nan lo hinca tur e tareanan di DPS bao di un stichting. Pa e stichting aki, e minister lo nombra e prome bestuur. Pasobra e ta kere di e forma aki e lo saca politica for di DPS of kita politica mas tanto politica for di enseñansa. Den ki forma e lo haci esey tampoco no ta comprendibel ainda, pasobra na final pais Aruba ta responsabel pa enseñansa di nos pais. Por lo tanto bo mester ta envolvi, bo mester por duna cuenta. Bo mester por duna e liñanan di un maneho cu e gobierno ta desea. Pa laga esaki control solamente den man di parlamento, segun Brito, esey no lo ta e formula cu lo por funciona. Parlamento lo por controla naturalmente tur e parti di e maneho cu a wordo hiba y e parti financiero. E lo no ta efectivo pa e ta responsabel tambe pa e control di e stichting riba su mes. Cualkier minister cu ta den enseñansa, lo mester ta envolvi cu e liña di maneho di enseñansa di un pais.

 

Poder di ambtenaar

Ambtenaar ta un status. Bo ta traha, bo ta un sirbido publico. Bo ta traha cu gobierno. Gobierno no ta cualkier dunado di trabao y esey semper SEPPA a bisa. Pesey tin biaha bo ta haya hopi confusion. Den e caso aki, si mester bay bek na e sirbido publico eynan, ta traha cu un gobierno, un gobierno cu de facto mester alomenos duna ehempel na tur otro dunadonan di trabao.

Dunadonan di trabao cu ta aplica por ta lo minimo loke cu ley ta stipula, abo mester por mustra con abo ta duna mas. Y cu esey purba pusha otro dunadonan di trabao, pa ta ehempel. E status di ambtenaar, su condicionnan laboral, su derecho y obligacionnan, ta stipula, nan ta fiho den un LMA. Nan ta fiho den areglonan vigente. Y den caso por ehempel ora cu bo no ta traha pa Gobierno, bo ta cay sea via un contract. Bo tin un contract di trabao, individual of colectivo y si no ta existi esey, cual ta sosode hopi tambe na Aruba, bo ta haya un contract di trabao cu ta bay na burgerlijk recht. Eynan bo ta mira e posibilidad pa tuma pasonan contra un ambtenaar ta menos, cu locual cu por ehempel den un caso di menos y largo. Tin proceduranan cu bo mester cana. Di otro bo por bay directamente na un ambtenarenrecht, di cual e ta atende asuntonan di ambtenaar y por facilmente tuma decisionnan. Den caso di retironan na nivel di burgerlijk recht, por dura mas largo, tin mas incertidumbre. Esey ta un di e puntonan hopi importante pa e trahado y bo ta tende minister ta mencion’e tambe cu e lo percura pa tin un proteccion mas pisa di retiro. E ta conciente di e caminda di e eventual paso of situacionnan, of busca permiso pa retiro na departamento di labor, ta mas facil cu un ambtenaar.