Sentro di Bario Lagun tin nos Atenshon Minister di Enseñansa, Siensia, Kultura & Deporte sra. M.Alcalá-Wallé na Recreatiecentrum na Lagun

Gobièrnu konforme e akuerdo di Gobernashon ta kere den edukashon físiko en general. Rekreo i deporte en partikular ta pilánan importante na formashon i salú físiko, mental i spiritual di hende.  E desaroyo di nos nashon den tur sentido di palabra mester haña atenshon. Pa es motibu aki tin diferente trayekto ta kanando  trahando riba e fasilidatnan deportivo riba nos isla.

 

Minister sra. M.Alcalá-Wallé a bai di bishita den e bario di Lagun pa tuma nota di e Recreatiecentrum Lagun. E sentro aki ta keda renová pa e organisashon Reda Sosial. Den kompania di Reda Sosial i Sedreko, Minister a tuma nota di tur e aktividatnan di e renovashon ku ta tumando lugá na e sentro.

 

Alabes Minister a papia ku presidente di Fundashon PRO-Bario Lagun ku ta sra. N. Jamanika-Miguel  i mas representantenan di e organisashon relashoná ku e posibel enkargo pa ku maneho di e Sentro aki. Tambe Minister a bishitá e veld di Bario di Lagun pa tuma nota di esaki.

 

Palabrashonnan konkreto a keda hasí pa manera ku e sentro keda kla esaki por bira disponibel pa  komunidat di Korsou i speshalmente esun di Lagoen i bisendario pa asina por rekreá i hasi uso di esaki den un ambiente sano i dushi. Ku esaki Gobièrnu di Kòrsou ta stimulá e área di rekreo i moveshon deportivo den barionan di nos pais. #ONTHEMOVE