Recientemente e seleccion nacional di gymnasia di Aruba a biaha pa Cali, Colombia unda nan lo ta compitiendo den e Campeonato Suramericano Gymnasia Artistica nivel USAG cual porcierto ta di nivel super halto. Riba e dianan 13 – 15 juli mas cu 69 delegacion – 870 gymnasta di 10 diferente pais den e region lo ta formando parti na e evento.
Mester bisa cu Aruba su seleccion a hiba un preparacion debido pa e competencia aki y a entrena pa varios luna den forma intensivo pa asina busca e resultado desea. Ta bon pa bisa cu como seleccion Aruba lo competi den e categorianan hubenil y senior. E gymnastanan cu a forma nos seleccion taAmika Every, Ashley Provence, Jesmea Jansen, Jasmine Bonsink, Junaidy Odor, Kim de Vries, Sanne van Dam. Notabel ta cu despues cu e seleccion nacional termina cu nan competencia na Cali, nan lo biaha pa e ciudad di Medellin unda nan lo atende un campo di entrenamento cu duracion di 4 siman.
Den e ultimo tres añanan e deporte di gymnasia a crece considerabelmente unda mas y mas mucha a cuminsa practica e disciplinanan di gymnasia artistica y ritmica. Cu un localidad nobo y moderno na Compleho Deportivo Franklyn Bareño na Piedra Plat como tambe na Centro Deportivo Playa, mas mayor a pone nan confiansa den e deporte aki . E guia profesional cu coachnan certifica, e deporte di gymnasia a cuminsa explora na nivel internacional y cu exito. Den varios competencianan bishita, nos gymnastanan a sa na logra triunfa cu varios medaya y mas y mas nos atletanan a cuminsa na competi den campeonatonan di nivel mas halto den nos region y continente. Esaki sigur ta un esfuerso y trabou duro di cada atleta, mayor y mas cu claro e propio federacion cu ta kere den e capacidad di su atleta y staf di coachnan.
Stichting Sportsubsidie Aruba a yuda subsidia e biahe y campo di entrenamento di e seleccion nacional di gymnasia di Aruba.
Cumprandoweganan di Lotto, e Loteria di Aruba bo ta contribui na deporte riba nos isla. Meta di St. Fundacion Lotto pa Deporte ta pa organisaloteria, cambia bida di suhungadonan y na mes momento inverti den deporte local pa medio di donacionnan na Stichting Sportsubsidie Aruba.
