Nos sa cu nos tabata mal para, pero di e estado cu Gabinete Mike Eman a laga nos pais ta
incomprendibel. Si e gobierno di Sr. Eman a keda un periodo mas, ayo Aruba y su Status
Aparte! Sr. Eman ta bay den historia como e lider di mas malo y mediocre den nos historia
politico.
Gobierno bao curatela
Desde 2014 Gabinete Mike Eman II ta bao curatela pa mal maneho di nos finansa publico y
consecuentemente esaki ta e realidad tambe pa Gabinete Wever Croes den 2018. Nos Prome
Minister hunto cu Minister di Finansa Sra. Xiomara Ruiz Maduro ta bezig actualmente cu
presupuesto 2018 pa esaki mester yega Parlamento den e prome kwartaal di aña. Un debe
nacional cu 87 cen di cada florin ta bay pa paga debe y cu solamente 13 cen ta resta pa por
goberna e pais aki. Sr. Eman y su gobierno a laga Aruba den un estado no-gobernabel.
Ilegalidad y Contrabanda
No ta for di awo nos a adverti di e maneho liberal di Gabinete Mike Eman unda a elimina
Warda Nos Costa, limita Inmigracion di traha, elimina radar y helicopter y buta nos
departamentonan di Gobierno plat pa sirbi interes di partido AVP y no di pais Aruba. Den 8
aña a hiba nos pais den un abismo total. Nos tur por corda con e ministernan di e gobierno
anterior tabata duna ordo pa laga hende bay, habri cierto negoshinan nocturno etc. Awo ta
sali na cla cu tin un promedio di 12.000 ilegal den nos pais di un solo nacionalidad, corda e
cifra total di personanan cu ta ilegal, esaki lo ta espantoso. Partido Movimiento Electoral di
Pueblo (MEP) su prioridad ta pa promove integracion y migracion mas humano, pero alabes
mas controla. Den 8 aña a ignora tur e leynan di bon gobernacion, te cu recientemente
Presidente di Venezuela a dicidi cu ta basta cu e contrabanda ilegal y cu esaki no a haya
atencion debido di e Gobierno anterior. Nos tur por corda con Sr. Eman tabata pronkia na
varios consulado aki na Aruba, butando e seriedad y diplomacia politico di nos pais den
peliger.
Caso Paul Croes
Ex-Minister di Labor Sr. Paul Croes a bay cera den prison pa un delito riba nivel
administrativo (caso IBIS) unda Ministerio Publico ta expresa cu ta un caso hopi coruptivo y
unda miles di victima di ontheffing gate di partido AVP a cay, perhudicando nos mercado
laboral local. Cuanto di nos hendenan no por haya trabao, e fenomeno di cheap labor, cuanto
hende riba onderstand y bijstand un abuso di marca mayor contra nos digno pueblo.
Solidarismo di Gobierno nobo
Mirando cu Gabinete Wever Croes tin e signatura di un gobierno Social democrata mi ta pidi
solidarismo cu e cuestion di ilegalidad. Nos tin leynan cu mester wordo respeta. Den
Gabinete Oduber, ex-Minister Rudy Croes a duna clemencia varios biaha na personanan cu
mester a drecha nan status pa por sigui e proceso di naturalisacion. Den Gabinete Mike Eman
hasta e proyecto "Dreamers" tabata un farsa total pa haya simpatia cu nos rumannan Latino. Nos tur por corda durante campaña con Sr. Eman tabata gaña publicamente den su reunionnan con e ta bay elimina cierto leynan pa acomoda esnan di afo. Cos a yega asina leu cu hasta un parlamentario den Tweede Kamer na Hulanda mester a hala atencion di nos ex-minister. Awe nos rumannan por wak e realidad cu Gabinete Mike Eman a laga nan aden. Tur cos tabata un show pa consumo politico y pa haya nan voto. Sr. Eman hasta tabata tin varios locutor di radionan Latino riba payroll pa hiba un politica di segregacion contra esnan estableci na Aruba. Partido Movimiento Electoral di Pueblo (MEP) ta kere den un maneho migratorio mas controlabel y mas humano. Desde nos Status Aparte nos a habri nos fronteranan pa trahadonan di exterior bin duna nos un man pa desaroya nos economia.
MEP ta kere den un maneho migratorio miho controla y mas humano, dirigi riba integracion real. Integracion ta indispensabel y fundamental pa por tin un comunidad na unda ta reina igualdad y fraternidad. Expresion di nos Libertador inmortal Betico Croes (qepd): "Arubiano no ta esun cu a nace na Aruba so, pero esun cu ta laga su pais di origen, bin contribui na nos economia, banderisa y respeta nos leynan, nos custumber y tradicionnan. E persona aki ta e mesun Arubano cu esun naci aki."
