E conocido periodista y presentado na radio y television, Ruben Trapenberg, a informa awe cu e ta bek na Aruba y ta sinti su mes bon. Su enfermedad, cancer, ta bou control y lo mester biba cune. E ta bek despues di 4 luna interna den hospital y bou tratamento specialisa na Hulanda.
Tur cos a cuminsa despues di eleccion, na October 2017 ora diripiente el a bira hopi malo. A interne na Hospital, cu na un principio a pensa cu e lo a haya un ataca di curason. A resulta cu no ta esey, a pensa lo ta piedra, pero a scan e curpa y realisa varios test.
Ta for di e testnan ey a saca afor cu e problema tabata hopi mas serio. A diagnostica Ruben Trapenberg cu cancer “lymphoma non-hodgkin”.
Despues di mas o menos 3 luna di hospitalisacion y intervencion medico di Dr. Jonkhoff y cu yudansa di AZV, a dicidi pa hiba e pashent Hulanda dia 3 di januari 2018 pa sigui tratamento abansa contra cancer lymphoma non-hodgkin.
A drenta Erasmus Medisch Center na Rotterdam mesora y ey a topa cu otro Arubianonan cu tambe ta haciendo e mesun tratamento ey.
Awe mainta e cantante y presentado a informa cu e ta bek na Aruba! “Nos ta bek di Hulanda y tratamento a bay bon. E cancer ta bou control y bida ta sigui. Un Danki di curason pa tur e oracionnan y atencion di boso; mi casa, yiunan, rumannan y famianan cu a yudami. En corto e salud awo ta bon. Danki Dios!”
