Rotonde di Tarabana para den caminda di Nissan Skyline

Diasabra marduga pa 4:15am a sosode un accidente na e rotonde cu ta uni Caya Betico Croes, Dadelstraat y Meiveld, conoci como e “Rotonde di Tarabana”. Obviamente e rotonde tabata para den caminda di un chauffeur femenino.

Na e sitio a topa cu un dama bastante cansa, cu la un of otro motibo no a mira e rotonde y a sigui stret cu su auto y a subi riba e rotonde. Claro cu e daño na e auto a resulta considerabel.

Na e sitio Polis a topa cu un auto marca Nissan modelo Skyline cu stuurwiel na man drechi, color shinishi, cu number A-62525. E chauffeur tabata hopi spanta, pero danki Dios no a resulta herida den e accidente.

E chauffeur a conta Polisnan cu e no sa kico a pasa pero diripiente el a subi e rotonde. E no por a splica dicon pasobra tur cos a sosode asina lihe. Como cu e no a dal den otro auto, e mes mester a paga Takelwagen pa baha e auto for di riba e rotonde y hibe su cas, pendiente pa e mes laga drech’e tambe.