Diadomingo ultimo District Governor sr. Waddy Sowma y su casa a yega Aruba. Waddy
Sowma ta e Governor di e Districto 7030 di Rotary International. Aruba y hermana
islanan Curacao y Boneiro ta forma parti di e Districto aki desde 1 di januari 2017.
Tur aña e District Governor ta bishita tur e islanan na unda tin un Rotary Club pa asina
conoce e miembronan di e club, e communidad y e proyectonan cu ta wordo ehecuta.
E bishita official a cuminsa na Club Kibrahacha 60+. Na aña 1985 bao di guia di
miembro honorario, sr. Eric D'Arnault, Rotary Club of Aruba a funda esaki. Awe en dia,
32 aña despues Club Kibrahacha 60+ a crece den un centro cu miembronan activo. E
District Governor a haña un presentacion di sr. Matos y un rondleiding di e lugar.
Na final tres mata a wordo planta na Club Kibrahacha 60+ pa conmemora e bishita aki y
alaves cumpli cu e deseo di e Presidente di Rotary International na unda tur miembro
rond mundo lo planta 1 mata e aña aki.
E bishita a sigui na Y.M.C.A Dakota. Otro organisacion cu pa añas ta ricibi donacion y
sosten di Rotary Club of Aruba. Rachel Croes y Bert de Vries a elabora ariba e
organisacion y actividadnan di Y.M.C.A.
District Governor y su casa a bishita despues Fundacion pa Hende Muher den
Dificultad (FHMDD). Aki nan a ricibi un presentacion tocante e trabao di FHMDD di sra.
Magaly Maduro e coordinador di e Fundacion. Alaves a splica e plan cu Rotary Club of
Aruba tin pa e fundacion aki. Anochi durante e reunion semanal di Rotary Club of Aruba e District Governor a haña un presentacion di e otro clubnan Rotaract y Interact cu ta forma parti di e famia di Rotary aki na Aruba. Presidente, Max Manichand a elabora ariba e actividad y proyectonan di Interact Club of Aruba di Schakel College. Despues a toca turno na
Presidente Ben Maduro di Rotaract Club of Aruba pa duna un presentacion. District Governor y su casa a keda masha impresiona cu e proyecto, actividad y miembronan di Rotary Club of Aruba, Rotaract Club of Aruba y Interact Club of Aruba. E la gradici tur miembro pa nan aporte na e communidad di Aruba y pa sigui haci un diferencia den bida di esnan cu mas mester di esaki. District Governor y su casa lo sigui nan bishita pa Boneiro y den weekend pa Curacao pa bishita e clubnan di e parti aki di Caribe. Presidente Gerardo Oduber ta sigur hopi contento cu e bishita importante aki y ta gradici tur miembro di Rotary Club of Aruba un biaha mas pa nan trabao boluntario cu nan ta hasi pa e club y Aruba. Esaki ta inclui e miembronan di Interact Club of Aruba y Rotaract Club of Aruba.
