E idea di Minister di Husticia, mr. Andin Bikker, pa pidi Gobierno di Hulanda pa permiti Cuerpo Militar pa asisti Gobierno di Aruba den e asunto di ilegalnan yegando tera via lama, ta inaceptabel pa e Fraccion di MEP den Parlamento. Mesun cos cu locual Fraccion di AVP, por medio di Parlamentario Robert Candelaria a bisa siman pasa, awe Rocco Tjon di MEP a ripiti mesun cos. Ta sinti cu Bikker a laga Polisnan cay den e proceso aki. Sea e Minister nobo no conoce e posibilidadnan cu Polis mes tin den cas pa cu e lucha aki, of no conoce e preparacion ni e autoridad di Militarnan Hulandes riba nos isla.
Parlamentario Rocco Tjon, kende tabata un ex Polis, a bisa cu den Cuerpo Policial mes ta sinti cu e mandatario no a duna nan oportunidad pa haci e trabou aki den forma eficiente. Polis tin diferente ekipo, entre otro e Rapid Response Team, cu ta bon prepara, entrena y cu arma pisa, pa atende cu e tipo di situacionnan peligroso asina den cual ta sospecha cu e otro banda ta arma.
Mas leu e Parlamentario a sigura cu Polisnan tin un preparacion di 4 aña mientras cu e Militarnan awor lo bay un curso pa haya e mesun podernan y autoridadnan cu un Polis. Esey pe ta inaceptabel y e ta puntra su mes tambe sin e ta legal den cuadro di nos leynan di procedemento penal. Un militar tin otro podernan y ta entrena pa otro situacionnan cu nota esunnan di un Polis. Busca y detene ilegalnan ta regla den ley cu ta un asunto pa Polis, Kustwacht y Warda nos Costa. E uzo di militarnan como tal ta un forma di pasa bo autoridad y autonomia pa Hulanda, locual sigur no por ta e idea.
Na final, Rocco Tjong a bisa cu “Tin unidadnan mas miho getrained, tin unidadnan mas miho ekipa cu armanan mas pisa caba, es decir, nos no ta wak e balor agrega pa awor aki bay percura pa Mariniersnan tuma e tareanan aki over. Semper un bon samenwerking cu Marina Real ta importante y nos ta aplaudi esaki. Sinembargo, e no mag di tuma e tareanan over. Pasobra na prome luga e ta keda un tarea policial y den e cadena di husticia e mester bira un joint venture cu tur e otro partnernan den husticia, es decir Douane, Warda nos Costa, Kustwacht, Imigracion, etc”, asina e Parlamentario a termina bisando.
