Rocco Tjon di MEP a haye cu e pregunta riba e presonan cu ta wordo laga den libertad prome cu tempo. A base di cierto criterianan ta laga presonan bay prome cu tempo. E ta un maneho interno na KIA hunto cu Ministerio Publico.
E problema ta, cu tin di haber cu e capacidad di e prizon. Na KIA e no ta diferente. Tin tanto cupo so cu por carga, y ora e maximo yega, atrabes di cierto criterianan ta laga presonan bay mas tempran cu libertad. Tin criterianan fiho cu esaki ta wordo basa, tanto interno como externo. Esaki semper lo bay no solamente e conseho cu ta yega na e mandatario, semper lo ta interno tanto na KIA como Ministerio Publico. Asina e lista ta wordo traha y ta wak e ora kende lo bay liber.
Ta midi
Pa e caso cu a causa conmocion den comunidad, ta trata di un persona cu a wordo condena pa pedofil. E problema ta cu un biaha mas e tin di haber cu e capacidad di detencion. Den KIA tin un seccion specifico caminda cu personanan cu a wordo condena pa tipo di actonan aki ta wordo cera. Mester separa nan for di e populacion general den KIA. Esey ta pa asuntonan di siguridad, pero tambe pa asuntonan legal. Semper tabata asina for di tempo cu e mes a bira director. Ora cu e hala aki yena y tin hendenan cu mester bin KIA pa e mesun acto aki, cual ta cera na un warda di polis, mester traha luga. E ora ey, atrabes di hopi criteria, atrabes di e acto cu el a comete, atrabes di su conducta den KIA, atrabes di por ehempel e analisis, e investigacion cu ta wordo haci, si e lo por comete e acto atrobe.
A base di esaki, KIA, hunto cu Ministerio Publico ta manda un porposicion pa e mandatario y e mandatario e ora ey ta tuma un decision.
Tin cu agrega cu esaki ta e manera di proceder. Tjon a sigui splica cu ta for di 2016 y semper el a bay asina. Tin casonan similar cu a tuma luga e temporada ey tambe.
Falta di capacidad
E rais di e problema tabata e falta di capacidad. E minister di husticia a duna informacion riba e tema aki durante diferente reunionnan cu tabata tin den un mision di asuntonan hudicial. Nan ta trahando pa yega na un prizon nobo. Te hasta ta asina leu cu un evaluacion a wordo haci, pa wak con lo bay yega na un financiamento pa un prizon nobo. Ta un proceso cu ta canando, segun Tjon. For di Parlamento tin contacto cu e minister riba e topico aki. Na final di dia, pa evita e tipo di casonan aki, no solamente ora ta trata zedendelicten, pero ki tipo di delito cu por ta, ta importante pa yega na un KIA optimal awor aki, cu no solamente tin cupo suficiente pa comoda detenidonan, pero tambe un KIA cu bo por brinda programa pa detenidonan di berdad por rehabilita y integra exitosamente den comunidad.
