“Parlamento a ricibi siman pasa e ley di ‘coalitieheffing’ un ley cu tin cu regla gran parti e 130 miyon na entrada cu gobierno tin presupuesta pa 2018 y loke ta preocupa nos cu esaki a un ley cu gobierno kier introduci ciegamente.
Un ley pa cual no tabatin consulta, no tabatin co8nseho, no tin ningun bista y pronostico di kico ta bay ta e efectonan macro economico pa cu introduccion di e medidanan aki.
Loke nos por wak en comparacion cu 2006 – 2007 tempo cu BBO a wordo introduci, caminda tabatin un aumento substancial di energia, un aumento substancial d prijs di gasolin, no tabatin crecemento economico y ta introduci un medida acumulativo BBO y tur hende por corda kico a sosode un aña despues cu inflacion di riba 10% y esaki tin tur e caracteristicanan cu esaki lo sosode atrobe.
Nos ta lamenta esaki y nos no ta compronde e ansha di gobierno tampoco, nos sa cu dia prome di juni tin un reunion di Rijksministerraad caminda podise nan a haci promesanan na gobierno Hulandes pa loke ta entradanan y nos no tin claridad riba esaki pero nos lo bay haci pregunta riba esaki.
Tin un ansha manera di morto pa introduci e ley aki y loke ta preocupa nos ta cu gabinete Mike Eman I y II a percura cu e poder di compra di esunnan cu ta gana menos di 2500 florin a aumenta cu 11% y ta algo cu cifranan di CBS ta confirma esaki y ora cu gobierno aki dicidi di elimina e ‘reparatietoeslag’ pa casi 10 mil pensionado, nos ta bay atras bek, dunando inicio na un deterioro social economico.
Mi ta kere cu mescos cu mi, tin hopi otro politico nobo cu a drenta e parlamento aki y mi persona no kier forma parti di e “politica nobo” aki, ya cu mi no ta kere cu ningun parlamentario por a prepara nan mes bon , ya cu ta 13 ley ta wordo cambia y e ley aki ta cambia sin cu nos tabatin acceso debido den fin di siman na e databank pero ya c a spera cu dialuna e preguntanan mester ta cla pa asina diamars e reunion publico wordo yama pa trata e cambio di ley aki.
Nos si kier hiba un politica nobo y pa tal motibo fraccion di AVP ta bay presenta un ‘notitie inzake financieel kader’ caminda a base di fondonan y datonan publico, datonan cu ta accesibel pa tur hende, nos lo pone disponibel riba nos facebookpage di fraccion caminda tur hende por wak e aumento di gasto di 125 miyon di florin compara cu realisacion di aña 2017 y tambe e 130 miyon florin cu gobierno lo ranca for di pueblo y tambe un aumento di gasto pa empresanan pa por cubri e maneho nobo aki,” Parlamentario Richard Arends a declara.
