Ainda gobierno di Hulanda no ta respeta decisionnan di parlamentonan den Reino. Reunionnan na Corsou tabata ultimo biaha cu no a concretisa den un reunion a bay largo y finalmente no a tende nada mas.
Por a mira cu como si fuera cu parlamento su poder no tey pa caba di regla e geschillen regeling aki.
Parlamentario Richard Arends di AVP, a splica cu esey tabata un di e temanan principal cu a atende. Durante di e reunion preparativo cu tabata tin, e tripartite cu tabata tin entre Corsou, St. Maarten y Aruba, e dia prome cu IPKO a cuminsa. A discuti esaki y pa Aruba e posicion di tur tres pais tabata intransigente y inaceptabel cu mas di ocho aña ta transcuri y ainda por tende gobierno Hulandes, kier pone geschillen regeling den frigidaire. Sa cu Raad van State den su capacidad como consehero di reino a entrega su conseho. Pero obviamente e conseho aki di Raad van State, ta bira publico na momento cu gobierno entrega e proyecto di ley na parlamento y na Hulanda den e caso ey Tweede Kamer.
Tanten cu gobierno Hulandes no entrega no presenta e ley aki na parlamento, no lo tin conocemento di e advies aki. Esaki tabata un posicion inaceptabel pa parlamento di Aruba, parlamento di Corsou, parlamento di St. Maarten y pa nan sorpresa tabata inaceptabel tambe, pa parlamento Hulandes. Hopi lihe a yega na un posicion y presidente di IPKO kende ta presidente di comision fiho di asuntonan di reino pa Tweede Kamer, sr. Pechtold, como tambe e presidente di e comision fiho di senado di Hulanda, sr. Ganzevoort, a manda un carta pa secretario di estado Knops, exigiendo cu pa prome cu dia 1 di November di e aña aki, e ley mester wordo entrega na parlamento den su totalidad, hunto cu e conseho di Raad van State.
Esey ta un di e logronan importante cu a haci durante IPKO, cu tur cuater Parlamento, incluyendo e parlamento di Hulanda, tabata riba un liña pa loke ta agendering di IPKO. Tanten cu e ley no wordo trata den un foro publico, esta parlamento, cada un por tin su posicionnan y cada un parlamento por tin opinionnan. Pero ta na momento cu e ley aki ta den parlamento, por hiba un discusion atrobe riba un contenido. Ta spera cu gobierno Hulandes tambe duna oido na peticion di su mesun parlamento y su mesun senado pa presenta e proyecto di ley aki. No ta simplemente un ley, sino un Rijkswet cu ta regla un instancia cu ta trata disputanan den reino y e disputanan aki a wordo palabra algun aña atras caba, cu e disputanan aki mester wordo atendi di manera imparcial, independiente y di un instancia cu obviamente ta duna un veredicto riba disputanan legal riba interpretacion di statuut.
No tin igualdad den reino
Hulanda ta call the shots. Si wak e constelacion di conseho di minister di reino, ta 17 minister Hulandes, un minister plenipotenciario di Aruba, Corsou y St. Maarten. Semper nos ta den minoria pa loke ta trata decision. Por a tuma nota tambe durante ultimo añanan, cada rato tabata purba stretch un biaha mas, te unda competencianan di reino ta yega. Esakinan ta basta limitativo defini den nos statuut. Sr. Mito Croes, dfm, a skirbi hopi riba e tema aki y un biaha mas, pa por tin un igualdad den reino, mester por tin e posibilidad di parkeer cierto discusionnan na instancianan imparcial, mientras cu ora tin un disputa ta parkeer cerca un hues, un instancia imparcial cu por duna un veredicto riba ken tin rason.
Obviamente no kier pa e yega te ey. Kier toch cu a base di un entendimento mutuo, un relacion madura entre paisnan di reino, por yega na solucionnan y cualkier diferencia di opinion, no necesariamente no mester yega na un conflicto.
