E cifra exacto no ta conoci, tin hende ta bisa 100 mientras otronan ta sigura cu ta como 200 carta di retiro a sali awe diabierna mainta via e compania priva Fast Delivery pa empleadonan di Gobierno. Ta trata aki di empleadonan cu Gabinete Wever-Croes ta considera cu Gabinete Mike Eman II a tuma den tempo demisionario of den aña di eleccion pa cual no ta respeta nan nombramento.
Durante e ultimo simannan aki, Prome Minister Evelyn Wever-Croes, hasta prome cu su huramentacion, a reuni pa oranan largo na Departamento di Recursonan Humano (DRH) riba e tema di empleadonan publico y esunnan nombra e ultimo lunanan. Ey a duna e Prome Mandatario, cu alabes ta encarga cu e departamento aki cu ta regula tur asunto di empleadonan publico, tur clase di informacion, guia y conseho riba con pa atende cu e tema delicado aki.
A para bira un formula cu na cambio di Gobierno ta kita cantidad di hende for di trabou, cu de facto no tin nada di haber cu e partido politico cu a caba di sali for di gobernacion. E ta un asunto cruel pasobra e politiconan si ta sigui cobra “overbruggingstoelage” pa 1 aña largo pero e empleadonan si ta perde nan trabou y nan entrada “per direct”.
For di mainta caba a cuminsa drenta yamadanan di empleadonan cu a haya carta “aangetekend” na nan porta di cas of oficina di Fast Delivery, indicando cu nan ultimo dia di trabou ta 31 di januari 2018 kitando dianan di vakantie pendiente, etc.
E fecha pa ricibi e carta ta haci hopi dolor pa e grupo envolvi, specialmente si considera cu ta riba e ultimo diabierna di aña, ora cu tur caminda ta tirando pagara y celebrando cambio di aña. Asina mes Gobierno ta considera cu ta un medida cu mester tuma pasobra tin hopi di e funcionnan no ta existi y a inventa trabou pa un grupo di hende.
Nel Oduber, ex-Prome Minister di Aruba y ex-Lider di MEP y kende tabata na manda na aña 2001 tempo cu AVP ta acusa MEP di a haci mesun cos a reacciona riba red social. El a culpa AVP pa cuminsa cu e mesun formula aki desde aña 1985 caba, pues 32 aña pasa. A considera tur esaki ‘persecucion politico’ y cu AVP kier a haci departamentonan di Gobierno “MEP-Proof”. Oduber a subraya cu e Mepistanan no a keda yora y a bay Hues. Segun Oduber, na aña 2001 Gobierno di MEP a gana 95% di e casonan cu a entama contra nan pasobra Henny Eman a nombra su empleadonan e tempo aya “voor de duurte van zijn Kabinet”, pues te dia 30 di october 2001.
Sinembargo, den e caso aki e nombramentonan ta diferente y como tal e casonan den Corte lo bira masha interesante, teniendo cuenta e cantidad di empleadonan envolvi cu a perde trabou y e forma con a nombra nan na trabou.
