Aki ta sigui un resumen di noticianan policial pa loke ta dia 27 di Juli.
Hoben ta saca cuchiu pa bartender den bar na San Nicolas
SAN NICOLAS – Diahuebs, pa mas of menos 12’or y 15 di marduga, a drenta un melding telefonicamente na warda, cu na Latin Passion Bar, situa den Caya Captain R. Rodgers, e bartende a haya problema cu dos hoben y cu un di e hobennan tabata tin un cuchiu y/of un arma di candela cune. Na e sitio e homber yama M. a declara cu dos hoben desconoci tabata molestia un barbuleta den e bar. M. a bay atende cu e dos hobennan aki, di cual un di nan a saca un cuchiu mustre. Un di e hobenan tabata tin un tshirt cora y e otro tabata tin un tshirt blanco. M. no por a mira mucho cos mas di e hobennan aki. Despues di esey e hobennan a cana bay. Dilanti di American Bar, polis a bin topa cu 5 pa 6 hoben, cu a wordo ristra pa polis, sin ningun eventualidad. E hobennan no tabata cuadra cu e descripcion duna. Riba vloer, banda di un baki di sushi, nan a bin haya un sombechi cu a wordo confisca. M. a wordo manda pa recherche, si e kier bay haci un denuncia. Polis a bay controla mas den centro, sin ningun eventualidad. Esaki tin atencion di polis. Comantante na warda y central a wordo poni na altura.
A scucha tiro den Parke Nacional Arikok
ARIKOK – Diahuebs, pa mas of menos 12’or y 25 di marduga, denunciante a yama warda y a informa cu el a scucha 6 tiro cu a bin for di Parke Nacional Arikok. Den cuadro aki, polis a bay na Parke Arikok. Na e entrada polis a wordo acerca pa e security di Safecom. El a declara cu ora e tabata den oficina, el a scucha 6 tiro. Despues el a scucha como sifuera un auto a core bay. Despues el a yama Safecom y a meld e suceso. Den cuadro di esaki polis hunto cu un otro patruya a bay controla den e parke. Nada en particular a wordo haya. Tambe e caminda cu ta core den Lagabena y nada particular a wordo topa. Comandante na warda y Central a wordo poni na altra. Esaki tin atencion di polis.
Kabouter ta horta bateria di auto
WASHINGTON – Diahuebs, pa mas of menos 8’or y 45 di mainta, Central a manda patruya na Washington, pa e conocido di husticia “Kabouter”, kende lo a horta un hende. Na e sitio a papia cu e homber N. Riba e tereno di cas na Washington tin hopi boto y partinan riba dje. N. a declara cu e tabata bezig cu algun trabao, ora cu el a mira un auto chikito blauw staciona. N. a mira e homber cu e conoce como Kabouter, coy dos bateria y core bay. N. a declara cu el a tira un obheto den direccion di e auto y a keda grita “Kabouter.” E auto a core bay. Segun N. el a mira un otro hende den auto, cual ta e chauffeur. N. a declara cu no ta prome biaha. N. a wordo conseha pa bay recherche pa duna keho. Central a wordo poni na altura.
Adicto ambulante ta molestia na pomp di gasolin
ORANJESTAD – Diahuebs, pa mas of menos 7’or y 37 di anochi, Central ta manda patruya na Citgo Boulevard den cuadro di molester di un adicto ambulante. Eynan polis ta topa cu e conocido RF. El a conta polis cu el a bay yuda un cliente cu yenamento di gasolin, pero e cliente no tabata kier y a bira fresco cu F. Polis a conta F cu e trahadonan di Citgo no kier y cu e no mester purba y mester bay di e luga. F. a mustra comprension y a bay. Central a wordo poni na altura.
Cacalaca Blanco coriendo rond den Pindastraat pa uza droga
DAKOTA – Diahuebs, pa mas of menos 9’or y 7 di anochi, Central t manda patruya tras di Pacifico Supermarket situa den Pindastraat den cuadro cu un auto sospechoso. Eynan polis a topa cu un Chevrolet Spark color blauw y den e auto tabata tin sinta e conocido JLF alias Cacalaca Blanco. Polis a puntre kico e tabata haciendo eynan y di ken e auto ta. El a conta polis cu el a bin uza droga y cu e auto ta di un homber yama JF y cu el a huur e auto di JF. Polis a controla e auto pa algun indicacion di ladronicia/joyriding, pero tur cos tabata na ordo. Polis a revisa e documentonan y tur cos tabata na ordo. Polis a puntra JF pa un recibo di e acuerdo di huur, pero JF a conta polis cu e no a ricibi ningun recibo. Patruya a pidi JF pa un rijbewijs pero no por a mustra esaki. Den cuadro di esaki, a traha un proces verbaal pa core sin un rijbewijs. E auto a wordo confisca y hiba na warda di polis na Santa Cruz, pa mas investigacion. Datonan a wordo tuma y Central a wordo poni na altura.